Blerina Gjylameti, deputete e PS-së, dhe kryetare e degës së kësaj partie në Tiranë, rezulton jo vetëm që ka mbrojtur doktoraturën me plagjaturë, por që ka kopjuar të paktën 22 faqe, në atë që ka paraqitur si temën e saj.
“Ndikimi i manaxhimit strategjik të burimeve njerëzore në performancën organizative – Rasti i organizatave të sektorit publik lokal”, është tema që Gjylameti ka mbrojtur doktoraturën, por që sot rezulton plagjaturë në një përqindje të lartë të saj.
Sipas studiuesit Vladimir Kola, i cili denoncoi vjedhjen intelektuale, udhëheqësi i kësaj doktorature është Prof. Dr. Perlat Lame.
Emri i Gjylametit për plagjaturë është përmendur disa javë më parë edhe nga ish-zv.ministri i Arsimit, Taulant Muka. Ky i fundit denoncoi se deputetja socialiste kopjonte artikujt që publikonte në revista në bashkëpunim me Ervin Demon, ish-zv/ministër i Arsimit.
Akuzat e Mukës pasuan me dorëheqjen e Demos nga posti i zv.ministrit të Arsimit, ndërsa nga deputetja e PS-së nuk pati asnjë reagim.
