Kreu demokrat, Lulzim Basha, ka vijuar takimet me qytetarët në Burrel, në kuadër të protestës së 16 shkurtit.
Basha i ka drejtuar një apel qytetarëve të Burrelit që të vijnë në Tiranë dhe të protestojnë më 16 shkurt kundër një qeverie që po vjedh shqiptarët.
Basha tha se kjo javë është vendimtare për të ardhmen europiane të shqiptarëve. Kreu demokrat i ka bërë thirrje shqiptarëve që të marrin në dorë fatin e tyre. Sipas kreut demokrat, pushteti nuk është i atyre që janë në karrike me vota të vjedhura, por i qytetarëve shqiptarë.
Por gjatë takimeve me qytetarët, ajo që ka tërhequr vëmendjen ishte një qytetari që iu drejtua Bashës: “haram buka nëse na ndan veri e jug! Haram buka nëse punëtorit në minierë nuk bëni që të marrë 1% të djersës. Po vdesin njerëzit në galeri!”
Dialogu i Bashës
Qytetari: “Haram buka nëse na ndan veri e jug! Haram buka nëse punëtorit në minierë nuk bëni që të marrë 1% të djersës. Po vdesin njerëzit në galeri!
Nesër do të bëhesh Kryeministër!
Haram buka nëse nuk na i plotëson këto dy gjera nesër. Ai (Rama) e ka harruar popullin. Mediat nuk dalin nëpër fshatra të shohin si vuajnë njerëzit.
Basha: Si të quajnë?
Burri: Më quajnë Liman Lleshi.
Basha: Siç e ka harruar veriun, e ka harruar edhe jugun. Pardje ai ishte ën Vlorë…
Limani: Jo, ne në Vlorë e shohim, nuk e shohim këtu. Ne në gjunjë jemi…
Basha: Nuk ka njeri t’ju ulë në gjunjë ju. Këta janë kapur në vjedhje flagrante. Kanë hequr bukën e fëmijëve të tua për të mbushur xhepat e tyre. 18 milionë euro i kanë dhënë një kompanie që nuk ekziston. i patë si i nxori Zëri i Amerikës? Karriget nuk janë të këtyre! Të shtunën do të shikosh: në një anë populli, në anën tjetër pas policëve do të jenë hajdutët. Koha e fjalëve ka mbaruar, të shtunën të jemi abshkë atje në Tiranë.
Qytetare: Ai shkon në Gjermani për të bërë piktura, ç’më duhen mua pikturat e atij. Unë dua bukë të ha. Çmimi naftës, dritat, uji, tatimet, ne po na mbysin. Me 16 ose shkoni ta rrëzoni atë barbon. Ai është kriminel dhe barbon. Taksat tona ai i merr dhe ruan gruan e vetë në Surrel me badigardë. Na ka ardhur në majë të hundës!
Basha: Më 16 shkurt do të bëjmë atë që bën çdo popull. Çdo popull në Europë i përzen hajdutët.
Qytetar: Ai nuk ka bërë asnjë gjë, e shkatërroi fshatin, shkatërroi vaditjet. Jam punonjës i bordit të kullimit, i shkatërroi bordet e kulllimit. Të gjitha veprat ujore janë copë-copë. Poshtë kjo qeveri e kriminelëve. E çove këtë popull në këmbë. Që tani ke votën popullore.
