Kukësi pësoi një humbje të hidhur të dielën, pasi u mund 1-0 nga Tirana. Ekipi verilindor, nga presioni për të marrë fitoren, u hodh i gjithi në sulm mbas minutës së 80-të, gjë e cila i penalizoi shumë, pasi skuadra u çekuilibrua në prapavijë dhe pësoi gol. Kjo humbje ka krijuar shkëputje me Partizanin kryesues, ku diferenca është thelluar në 8 pikë.
Mbas ndeshjes, drejtuesit dhe gjithë futbollistët e Kukësit u shfaqën mjaft të mërzitur dhe të stresuar, gjendja dukej si një luftë e humbur. Presidenti Safet Gjici u largua i pari nga stadiumi, ku mërzitja dhe zhgënjimi i tij ishin të dukshme.
GJICI THIRRI DREJTUESIT
Presidenti Gjici fill mbas ndeshjes, përmes drejtuesve lajmëroi ekipin për mbledhje urgjente të hënën në orën 10:00 në zyrat e klubit. Mbas këtij njoftimi të gjithë e morën të koduar mesazhin dhe u përgatitën. Sakaq, në darkën e pasndeshjes kreu i klubit mblodhi në kafe stafin e ngushtë të drejtuesve dhe trajnerin Cungu dhe u kërkoi llogari për humbjen, e cila ishte e papranueshme sipas tij.
Trajneri mori përgjegjësitë e tij, por theksoi se rastet dhe loja nuk i munguan skuadrës. Të paktën 5 raste goli të pastra, të gjitha të shpërdoruara. Gjici nuk mori parasysh asgjë nga ato që i tha trajneri, por i kërkoi atij 3 pikët dhe kthesën urgjente. Për Teutën llogaritë bëhen me tri pikët.
Tekniku Cungu u shpreh i hapur dhe i gatshëm se pranon çdo vendim të presidentit, sepse ai e njeh mirë veten, punën e tij dhe atë çfarë ka bërë dhe di të bëjë me ekipin. Sakaq, presidenti dhe pse me kritika e votëbesoi Cungun, pasi ka besim te puna dhe aftësitë e tij.
