Dekanati i Fakultetit të Drejtësisë në Universitetin e Tiranës u ka kthyer përgjigje kërkesave të studentëve protestues. Këta të fundit, i drejtuan disa kërkesa dekanit Artan Hoxha si dhe i lanë afat kohor deri më 12 shkurt për plotësimin e tyre.
Këtë të hënë, dekanati ka zhvilluar një mbledhje dhe ka dalë me 6 vendime, me qëllim plotësimin e kërkesave.
“Të rikostruktojë programin mësimor duke shtyrë për dy javë sezonin e provimeve. Programi mësimor organizohet në përputhje me strukturën e re të vitit akademik. studentët protestues nuk do të penalizohen në asnjë formë për ushtrimin e së drejtës për të protestuar. Afati i bursave është shtyrë deri në datë 18.02.2019. Dekanati angazhohet më tej të përmirësojë më tej ofrimin e pikave të studentëve në Organet e Drejtësisë dhe institucione të tjera”, janë pesë nga vendimet e marra në asamble.
Ndërsa vendimi i gjashtë ka të bëjë me shfuqizimin e dy pikave të një neni të ligjit të Arsimit të Lartë lidhur me provimet e shtetit. Kjo është kërkuar nga studentët dhe dekanati bën me dije se ia ka përcjellë kërkesën ministres së Arsimit Besa Shahini.
/Boldnews.al/
