Ministri i Brendshëm, Sandër Lleshaj e ka quajtur si kriminale vendimin e pesë gjyqtarëve të cilët miratuan reduktimin e dënimin e përjetshëm të Dritan Dajtit, duke ia konvertuar në 25 vjet burgim.
Lleshaj tha se forcat e policisë nuk do të gjejnë paqe deri sa të vendoset Drejtësia.
“Njerëz të çartur, pa fe dhe atdhe po çmenden para parasë së krimit. I siguroj familjarët e 4 dëshmorëve se përgjigja e institucioneve do të jetë e fortë dhe ligjore në respektim të plotë, ”, deklaroi Ministri i Brendshëm.
“Nuk mund dhe nuk do të ketë paqe në shpirtin e Policisë së Shtetit, por edhe mua si ministër i Brendshëm, derisa ky vendim jo vetëm të zhbëhet nga Gjykata e Lartë, por derisa autorët e këtij akti të pashëmbullt dhe fyes për gjakun e gjithë dëshmorëve të policisë së shtetit të përballen me ligjin dhe drejtësinë e vërtetë.”, shtoi më tej Lleshaj.
“Si pasojë e një vendimi kriminal të disa gjyqtarëve që meritojnë plotësisht të bashkohen prapa hekurave të klientëve të tyre. Kam pritur këto 48 orë sa të sigurohesha që krimi i njerëzve me imunitet ligjor dhe Kushtetutës të mos kishte si reagim vetëm një deklaratë publike, por edhe një reagim të fortë e të vendosur dhe një proces të qartë dhe ligjorë.
Edhe pse nuk mund të jap detaje, operacioni Forca e Ligjit është vënë në veprim të plotë për ta adresuar me të gjithë forcë e së drejtës atentatin e qartë, brutal dhe skandaloz që i është bërë drejtësisë në vendin tonë”, përfundoi ministri.
