Partia Socialiste duke se po përcakton një nga një kandidatët që do të ketë për zgjedhjet lokale të 30 qershorit, ndërsa procesi i përzgjedhjeve ka nisur me disa nga bashkitë e cilësuara si niveli i dytë. Kështu mësohet se për Bashkinë e Shijakut, socialistët do të kandidojnë deputetin Ilir Ndrazhi, i zgjedhur në 2017 si deputet në Qarkun e Durrësit, pikërisht në zonën e Shijakut.
Burimet nga PS bëjnë të ditur se kryebashkiaku aktual i Shijakut, Ardian Kokomani, nuk do të rikandidohet, ndërsa mes emrave që janë testuar në bazën e socialistëve ka kryesuar Ndrazhi. Boldnews.al ka mësuar se gjithashtu Ndrazhi ka mbështetjen edhe të kreut aktual të bashkisë, i cili duket se e ka mbështetur edhe dy vjet më parë për të fituar garën elektorale në Shijak, si deputet.
Ndrazhi përfshihet ndër deputetët që nuk është aktivizuar asnjëherë në seancat e Kuvendit të Shqipërisë me fjalime, por duket se kjo nuk ka ndikuar që ai të kryesojë listën e kandidatëve për Bashkinë e Shijakut.
Ndërkohë Boldnews.al ka mësuar edhe disa nga kryebashkiakët socialistë që duket se në 30 qershor do të kërkojnë një tjetër mandat për të drejtuar bashkitë ku në 2015 kanë fituar. Kështu Armando Subashi dhe Tërmet Peçi, përkatësisht kryebashkiakë të Fierit dhe Tepelenës do të kërkojnë një tjetër mandate. Në Korçë, Sotiraq Filo do të rikandidohet, sikundër Tonin Marinaj në Malësinë e Madhe.
Në Vlorë pritet të rikandidohet Dritan Leli, sikundër në Roskovec, Majlinda Bufi. /Boldnews.al/
