Kreu demokrat Lulzim Basha deklaroi prerazi nga Vlora se kur ligji të zbatohet njëlloj për të gjithë, atëherë Shqipëria mund të integrohet në Europë.
Basha tha se në Europë shkohet me sjellje europiane dhe jo me mashtrime.
Referuar përgjimeve të publikuara ku rezulton i përfshirë edhe kryebashkiaku i Durrësit, Vangjush Dako, në shit-blerjen e votive, Basha tha se nëse Kodi Penal do të zbatohej, atëherë Dako nuk do të ishte kryetar bashkie, por do të ishte në burg.
“Kodi Penal i Republikës së Shqipërisë i amenduar pas 17 majit thotë se kush kapet duke vjedhur vota vendin e ka në burg. Në vend që ta kemi Vangjush Dakon në burg, sot e kemi kryetar bashkie. Esenca që e ndan një shoqëri europiane apo jo evropiane është mënyra se si zbatohet ligji. Dera e Europës nuk hapet me hilera.
Do të garantojmë që ligjit aty ku është thyer të kthehet dhe të zbatohet, por do të garantojmë që edhe abuzuesit të gjykohen për shkeljen e kryer. Kjo do të marrë fund, pavarësisht nëse je votues i PD apo i PS-së”, theksoi Basha.
