Vetëm gjatë vitit 2018, në Gjykatën e Beratit shënohen shifra të frikshme sa i përket zgjidhjes së martesave. Sipas burimeve që vijnë nga Gjykata e Beratit, në këtë qytet çdo ditë është divorcuar një çift, ndërkohë që nga 1/3 e tyre kanë përfunduar me dhunë në familje.
409 kërkesa për divorc janë paraqitur gjatë vitit që lamë pas, ndërkohë që 65 të tjera ishin të mbartura nga viti 2017. Gjykata zgjidhi martesat për 329 çifte.
Ndër arsyet më të shpeshta të kërkesave për divorc mund të përmendim emigracionin e bashkëshortëve, punët sezonale në qytete të tjera të vendit, tradhëtia, kushtet e vështira ekonomike si dhe diferencat kulturore dhe arsimore.
Më së shumti kanë qenë gratë që i drejtohen të parat gjykatës për të zgjidhur martesën. Gjatë 2018, 65% e kërkesave për divorc kanë ardhur nga gratë dhe 35% nga burrat.
