Nga Boldnews.al
Kryeministri Edi Rama i lodhur me mbledhjet e Këshillit të Ministrave, që më shumë se debate dhe ide nga ministrat, janë monolog dhe angari për Ramën, ndaj ka vendosur që kompetencat e numrit një të qeverisë t’ia kalojë Erion Braçes, që mban zyrtarisht postin e zëvëndësministrit.
Në mbledhjen e fundit të Këshillit të Ministrave, të mbajtur gjatë paradites së sotme, Braçe ka hedhur firmën si titullar për disa VKM. Ndër të tjera ishte edhe shkarkimi i Drejtorit të AKU-së Agim Ismali dhe zëvendësimin e tij me Agron Hetojën.
Më shumë se vendimet e marra, është praktika që po ndjek Rama për të qeverisur vendin. Në mandatin e dytë si kryeministër, nëse shihen disa nga VKM-të në shumë raste mbajnë firmën e ish-zëvendëskryeministres Senida Mesi. Tashmë që vendin e saj e ka zënë Braçe, ditën e sotme ka hedhur firmën si titullar. Poshtë çdo vendimi të marrë thuhet: “Kryeministri Edi Rama, në mungesë dhe me porosi zëvendëkryeministri Erion Braçe”. Kjo konsiderohet juridikisht si kalim kompetencash me autorizim.
Për Ramën e rëndësishme mbetet që të “qeverisë” virtualisht në Tëitter, Facebook apo në ER TV. Aty të shfaqet si kreu i qeverisë, ndërsa për çështjet që realisht duhet të obligohet, me vendime e nisma ligjore ua kalon vartësve të tij.
Të njëjtën praktikë ndoqi edhe me zëvendëministrin Gent Cakaj. Pasi u refuzua kandidatura e tij nga Presidenti Ilir Meta, numri një i qeverisë luajti taktikisht, duke propozuar veten edhe si Ministër për Europën dhe Punët e Jashtme. Menjëherë pasi u betua para presidentit, kompetencat e ministriat ia delegoi 28-vjeçarit Gent Cakaj. Një investim personal i tij dhe këshilltarit të çështjeve të “mëdha”, Baton Haxhiu.
Ndërsa në rastin Braçe çështja është edhe më e “thellë dhe e gjatë”, për shkak së zëvendëskryeministri i ri u ble në “merkaton e janarit” si një sulmues ndaj padrejtësive dhe abuzimeve në zyrat e shtetit.
Deri më tani Braçe është parë në disa institucione duke kërkuar llogari për çështje konkrete në zyrat e Hipotekës, ALUIZNI-t dhe të drejtorive të tjera. Krahas detyrës për të përmirësuar imazhin negativ të krijuar masivisht në publik për çështjen e korrupsionin dhe aferave të zyrtarëve të lartë publik, Braçe pritet të jetë “Kryeministër” me autorizim.
