Menjëherë pas përfundimit të ndeshjes në Vlorë mes Flamurtarit dhe Kukësit, një moment aspak i këndshëm ka ndodhur në hollin e stadiumit “Flamurtari”.
Për “Supersport”, nga klubi vlonjat u njoftua se trajneri Ilir Daja nuk do jepte një prononcim për emisionin “Gol pas Goli”, por në fund administratori Idrizi vendosi që do fliste ai për të sqaruar situatën.
Në këtë moment, kur Idrizi po bëhej gati të fliste, disa tifozë të Flamurtarit, po prisnin tek dera e hyrjes së stadiumit, trajnerin e Kukësit, Armanda Cungu, për ta ofenduar, si në gjithë takimin. Idrizi u largua nga intervista, për të shuar sherrin dhe grindjen që po ndodhte, dhe i kërkoi të ndaleshin e të lejonin trajnerin fitues të largohej i qetë.
Idrizi i kërkoi tifozëve që të tregonin qytetari, dhe se incidentet apo sendet e hedhura në fushë, dëmtojnë vetëm Flamurtarin dhe askënd tjetër.