Dy muaj më parë iu plagos djali, eksploziv para lokalit. Një sasi prej rreth 200 gramësh lëndë eksplozive tritol është vendosur në hyrje të një lokali në lagjen “Pavarësia” të qytetit të Vlorës.
Eksplozivi me fitil ishte vendosur pranë derës së lokalit, ndërsa është gjetur nga pronari në orët e para të mëngjesit të ditës së enjte, në momentin kur i është drejtuar biznesit të tij. Lokali në fjalë është në pronësi të Adriatik Brahimajt, i cili është dhe personi që ka bërë denoncimin në Polici.
Pas rrethimit të perimetrit të sigurisë, forcat xheniere që shkuan në vendngjarje kanë këqyrur nga afër çantën e vendosur te dera e lokalit dhe është konstatuar se bëhej fjalë për një sasi lënde eksplozive (tritol) rreth 200 gramë, ndërsa ishte i lidhur me fitil. Forcat xheniere më pas bënë dhe çaktivizimin e lëndës plasëse.
Nga ana tjetër, Policia ka siguruar edhe kamerat e sigurisë në zonën përreth, me qëllimin për të identifikuar mes pamjeve të këtyre të fundit edhe personat përgjegjës për vendosjen e lëndës eksplozive. Dyshimet e para të Policisë janë se bëhet fjalë për një paralajmërim ndaj pronarit të lokalit.
Çanta me lëndën eksplozive të çaktivizuar është marrë më pas nga grupi hetimor, ndërsa synohet që edhe përmes saj të gjendet ndonjë gjurmë e mundshme e autorëve. Një nga pistat, sipas Policisë, është konkurrenca. Në pyetje është marrë edhe pronari i lokalit, 51-vjeçari Brahimaj, por sipas Policisë ky i fundit nuk ka pranuar të ketë konflikte.
Policia dhe burime nga kjo e fundit saktësojnë se bëhet fjalë për një paralajmërim, pasi lënda nuk mund të shpërthente pa u ndezur nga afër. Një tjetër pistë e hetuar nga Policia është edhe ajo se autorët mund të kenë ngatërruar objektiv dhe ta kenë vendosur gabimisht lëndën plasëse në lokalin e Brahimajt.
Kjo konsiderohet si një pistë që nuk hidhet poshtë nga Policia, duke parë edhe dinamikën e ngjarjes, por edhe faktin se 51-vjeçari nuk rezulton person me konflikte të hapura.
PLAGOSJA E DJALIT
Dy muaj më parë, djali i pronarit të lokalit që iu vendos eksploziv, mbeti i plagosur me pistoletë. Ngjarja ndodhi në nëntor të vitit të kaluar, në një zonë pranë Universitetit “Ismail Qemali” në qytetin bregdetar. Sipas Policisë, Brikelo Brahimaj mbeti i plagosur pas një sherri të çastit, për motive të dobëta.
