Mbrëmjen e sotme Lapraka u trondit nga një ngjarje e rëndë, ku si pasojë mbeti e vdekur 17-vjeçarja Griselda Gjinkola. Mësohet se e reja ka ndërruar jetë në spital. Ngjarja ka ndodhur në orën 18:17 e ditës së sotme.
Nga sekuestrimi i kamerave të sigurisë në bizneset përreth ku ka ndodhur edhe ngjarja, policia ka identifikuar njërin nga autorët, por ende nuk e ka bërë të ditur për shkak të vazhdimit të hetimeve.
23-vjeçari që mbeti i plagosur nga ky atentat, Erion Denga është transportuar në gjendje të rëndë në spitalin e Traumës, por të dhënat e fundit tregojnë se gjendja e tij shëndetësore është stabilizuar. 23-vjeçari është qëlluar në qafë e në shpatull. Ai po i nënshtrohet një ndërhyrjeje kirurgjikale.
Gjithashtu e ditur bëhet se dy të rinjtë që ndodheshin në një makinë, nuk ishin banorë të zonës së Laprakës. Ata kishin ardhur në këtë lagje për të konsumuar kafe në një nga lokalet e zonës.
Mendohet se dy të rinjtë kanë pasur një lidhje jo të gjatë dashurie mes tyre. 2 personat, autorë të ngjarjes së rëndë, janë larguar në këmbë mes pallateve në errësirë.
Para një jave 23-vjeçari ishte konfliktuar me të riun që është parë edhe nga kamerat e sigurisë, për shkak se i kishte ngacmuar të dashurën.
