Policia ka arritur të vërë në pranga një nga autorët e masakrës të ndodhur në zonën e ish-Bllokut.
I arrestuari është Fabiol Alushi.
Një nga ngjarjet më tronditëse për Tiranën dhe Shqipërinë, ishte ajo e 4 tetorit, ku në një lokal në zemër të Bllokut, u vra një person dhe u plagosën disa të tjerë. Ngjarja bëri bujë sepse aty protagonistë ishin personazhe të njohur dhe u lakuan emra të njohur si ai i këngëtares Elvana Gjata. Siç të gjithë e dimë, ngjarja ndodhi në lokalin “Monopol”, ku pronar është Redi Popesku.
“Seksioni për hetimin e krimeve ndaj jetës në vijim të komunikatës së dhënë më datë 05.10.2018 u ndalua shtetasi në kërkim F.A., vjeç 42, banues në Tiranë. Nenet 79, 22, 25 dhe 278 të Kodit Penal”, thuhet në njoftimin e policisë.
Në kërkim për këtë ngjarje janë shpallur edhe Meviol Bilo, Ervin Mata dhe së fundi edhe biznesmeni Eldi Dizdari. Ndërkohë këngëtarja Elvana Gjata nuk është më në kërkim policor, pas përfundimit të afatit 30 ditor.