Nga Boldnews.al
Kryeministri Edi Rama në një monolog të gjatë, nën trysni dhe shumë i shpërqëndruar, i bëri thirrje deri në çjerrje studentëve protestues që ta takonin për të dialoguar dhe “zgjidhur” problemet me të. Një taktikë e vjetër e kreut të qeverisë, që edhe dje nuk doli nga skuta e tij e propagandës, duke u kërkuar Forumeve Rinore Eurosocialiste (FRESH-it) që të “shtireshin si studentë” që pyesnin kryeministrin, apo ngrinin shqetësimet e tyre.
Në një postim të publikuar nga ‘Lolita’, është zbuluar edhe prejardhja e komenteve, ku direktivat kishin ardhur nga lart, më saktë nga Elio Hysko, kryetari i FRESSH. Në këtë mënyrë ka vijuar “bashkëbisedimi vitual”, ku për të bërë të besueshëm këtë shfaqje kishte edhe pyetje gjoja me frymë kritike.
Që të gjitha më shumë se kërkesë llogarie, ishin pyetje të porositura, për të dalë aty ku donte kreu i qeverisë, por studentët nuk janë tërhequr, përkundrazi sot kanë artikuluar se nëse deri nesër në orën 16.00 nuk plotësohen tetë kërkesat e tyre, atëherë protesta do të përshkallëzohet, duke nënkuptuar grevë urie dhe deri revoltë.
Stafet e ngushta të kryeministrit, veçanërisht armata propagandistike i ngjan “Rinisë komuniste” të vitit 1990, që edhe pas shembjes së monumentit të Enver Hoxhës këndonin e bënin thirrje për vijimësinë e komunizmit. Një iluzion që ishte në mëndjet e tyre, pa e parë realitetin poshtë në masat e qytetarëve dhe veçanrisht në brezin e ri, që përveç shpresës, po humb edhe dinjitetin.
Ndërsa kryeministri Edi Rama pyeste e përgjegjëj po vetë, i ndihmuar edhe nga pjesa e stafit të ngushtë (mono(l)loqet e Rilindjes), që ngrinin “shqetësimet” sipas kërkesave të stafit, u duke se lëshoi shumë. Ai premtoi diskutim për përgjysmim të tarifave të studimit, kushte të mira në konvikte dhe fakultete, por si gjithnjë përgjegjësinë nuk e mbajti kurrë për vete, duke ia atribuuar dekanëve, stafeve pedagogjike që janë në bordet drejtuese, e madje edhe administratorëve të qeverisë që janë emëruar në fakultete. Këta të fundit i paralajmëroi se thuajse janë të shkarkuar. Rama kërkoi pa pushim deri në përulje, dialog me studentët, por përgjigjen për këtë afrim të qeverisë e mori në sheshin para Ministrisë së Arsimit ku studentët e revoltuar ia prenë shkurt: “Plotëso kërkesat, je i pabesueshëm”.
“Duhet të plotësohen të 8 kërkesat, pastaj ulemi rrugës dhe i diskutojmë. Janë të pangeciueshme. Ne nuk pranojmë të negociojmë në asnjë mënyrë. Nuk duam të marrim premtime të rreme. Sot është pika ku kupa ka nisur të derdhet. Ata nuk deshën dialog kur vendosën tarifat”-thanë studentët protestues, ndërsa e bënë të qartë se: “Deri nesër kemi dhënë ultimatum, pastaj do ta përshkallëzojnë. Nuk duam që studentët të plagosen dhe të gjakosen. Do futemi në grevë urie. Edhe e marta do të jetë protestë paqësore, të mërkurën në grevë”.
Kryeministrit i ka mbetur edhe 24 orë për të reaguar, por me gjasë janë 24 orët e fundit në një pushtet të qetë, pasi revolta studentore nuk është vetëm e karakterit ekonomik apo për më shumë të drejta, pasi vjen si reagimim i varfërisë, korrupsionit qeveritar, përqëndrimi i gjithë ekonomisë së vendit në duart e pesë oligarkëve, pasiguria, trafiqet, kanabizimi, lidhjet e politikës me krimin, arrogancën qeveritare e mbi të gjitha mungesën e shpresës.
Për të bërë diversionin dhe shuar një frymë proteste, që mund të çojë deri në rrëzimin e qeverisë, Rama u sugjeroi studentëve që të mos dëgjonin Monika Kryemashin apo Lulzim Bashën, por të afroheshin me të për një “bashkëqeverisje me studentët”. Kjo frazë nuk është as më shumë e as më pak se artikulimet e një lideri që përfaqëson shtetin oligarkik-autokratik, të mbushur me propagandë.
Thelbin e kësaj revolte kryeministri duket se ende nuk e ka kuptuar. Studentët edhe pse me kërkesa në dukje vetëm në interes të grupimit të tyre, po përfaqësojnë frymën antiqeveritare që ndihet kudo tek qytetarët, por e kanë të vështirë të grupohen. Orët janë të numëruara, e nesermja është dita e madhe e gjykimit, kreun e qeverisë nuk po e ndihmon më, përkundrazi po e degradon propaganda e tij.
