Nga Boldnews.al
Fjalori politik i pushtetarëve shqiptarë ka fituar disa “nocione” të reja, pas protestave që përfshinë vendin gjatë ditëve të fundit.
Fillimisht, “njeriu i mirë”, kryetari i Bashkisë së Tiranës, Erion Veliaj, i quajti shpellarë e më tej talebanë banorët e Unazës së Re, të cilët protestojnë në mbrojtje të banesave të tyre dhe kundër projektit korruptiv të Unazës së Madhe.
“Lali Eri”, pavarësisht forcës së treguar në median e kontrolluar prej tij apo në takime të stisura, me “banorë” të sajuar që në fakt janë vartës të tij, nuk ka pasur guximin që të përballet me protestuesit e Unazës së Re, me ata të vërtetët, të cilët kanë më shumë se një muaj që kundërshtojnë hapur vendimin qeveritar për prishjen e shtëpive të tyre.
Paralel me protestën e Unazës së Re, qeveria u përball së fundmi edhe me revoltën e studentëve, të cilët kundërshtojnë rritjen e tarifave që aplikohen në Universitet. Edhe përballë këtyre protestave, qeveritarët nxorën në pah arrogancën e tyre.
Kryeministri Edi Rama i quajti “ngelës” studentët, të cilët kundërshtojnë Vendimin e Këshillit të Ministrave. Ai u shpreh, i trimëruar pas “facebook-ut” se nuk kishte ndërmend që të tërhiqej nga rritja e tarifave për studentët.
Pas tij, ministrja Lindita Nikolla, nëpërmjet stafit të saj, i konsideroi studentët “të papërgjegjshëm”, për shkak se ngelin në provime.
Dhe, pasi lëshuan rrebeshin e fyerjeve për studentët, më në fund qeveria e Edi Ramës vendosi të tërhiqet përballë studentëve. Të rinjtë, natyrisht mbeten “të papërgjegjshëm” dhe “ngelës”, por nuk është e qartë se cili mund të jetë epiteti i përshtatshëm për qeveritarët, të cilët u detyruan të pranojnë kërkesat e të rinjve.
Asnjë prej këtyre pushtetarëve nuk flet për kostot që po i shkaktojnë grupeve të ndryshme shoqërore vendimet e tyre të pamatura, në rastin më të mirë, apo korruptive në rastin më bindës.
“Lali Eri” që shfaqet si personazhi “Mogli” përballë “shpellarëve dhe talebanëve” nuk ka asnjë përgjigje se përse po lufton për një projekt, i cili përllogaritet në 20 milionë euro për një kilometër. “Lali Eri” nuk ka asnjë përgjigje se përse ka vendosur, së bashku me qeverinë, t’u prishë shtëpitë disa qindra banorëve, për t’i dhënë udhë një projekti, të realizuar në mënyrë tërësisht fiktive.
Edi Rama dhe Lindita Nikolla, natyrisht, nuk kanë asnjë përgjigje se përse studentët janë “të papërgjegjshëm” dhe “ngelës” që nuk meritojnë përkrahjen e qeverisë. Këta dy të fundit, të cilët nuk e kanë për herë të parë të zbythen para studentëve, nuk dinë të kërkojnë asnjëherë falje për përroin e ofezave që lëshojnë ndaj të rinjve, ndaj atyre që kanë vendosur të jetojnë në Shqipëri.
