Nga Bledian Koka
Lulzim Basha ka humbur shumë nga marrëveshja e 17 Majit me Edi Ramën. Humbi zgjedhjet, humbi partinë paçka se me të vetën e fitoi duke u vetëngrirë. Humbi mundësinë e vetme që ka patur një politikan në Shqipëri që të bëhet Kryeministër po duke humbur. Humbi edhe besimin e demokratëve se ai mund t’i sjellë ndonjëherë në pushtet.
Lulzim Basha ka humbur shumë në 5 vjet, së pari ka humbur smaltin e një shinnig star-it që e bëri PD-në të llamburiste nën buzëqeshjen e tij nga 2005-a kur u vu në krye të KOP-it (Komiteti i Orientimit të Politikave).
Ka humbur zellin për t’u patur lakmi me të cilin shënjoi në 2009-ën rezultatin më të mirë që PD ka patur në Elbasan duke marrë 7 nga 14 deputetët e qarkut.
Lulzim Basha madje e ka mundur edhe kokë më kokë kundërshtarin e tij politik Edi Ramën në 2011 kur ia mori bashkinë me mbi 150 vota diferencë megjithë batërdinë që u bë nga socialistët në bastionin e tyre të përjetshëm në njësinë 5 (alias ish-Blloku i udhëheqjes).
Lulzim Basha në 8 vitet e qeverisjes demokrate i janë besuar ndër detyrat më delikate të objektivave të Sali Berishës dhe po, ai i ka bërë ato, ku me pak shtysë, ku me pak fat, po gjithmonë me shumë, po shumë punë.
Lulzim Basha ka marrë nga 2013 e këtej mbi shpatullat që nuk e mbajnë dot peshën e PD-së me trashëgiminë e fortë të SB-së.
Vitet e opozicionit të Lulzim Bashës janë karakterizuar nga një flegmatizëm aksioni dhe agresivitet institucional denoncimesh në foltoren e SHQUP-it dhe shumë shumë një protestë në vit para kryeministrisë.
Pra, fiks një parti europeiste flamande, siç Lulzim Basha u vetëpërshkrua gjatë betejës së vetme dhe të fundit që ka patur PD-ja në 28 vites mes tij dhe të Kolit të ndjerë.
Fundja Lulzim Basha i ka qëndruar fjalës se ai nuk ishte Sali Berisha, dhe se vizioni i tij politik ishte ajo ultra-perëndimore ose më saktë, ultra-e Vendeve të Ulëta.
Lulzim Basha humbi në 2017-ën mundësinë për të bërë paqje me ata që nuk e donin e nuk donin brenda PD-së.
Më shumë se njëherë Sali Berisha i ka sugjeruar që të “mbledhë të gjitha kontributet” e t’i fusë në parti, por reagimi i Bashës edhe në këtë pikë ka qenë institucional ashtu si edhe opozita e tij.
Ai është limitur në përgjigjen e tij se cfarë do të bënte për të kthyer të pakënaqurit që mbetën jashtë listave. Përgjigja e Bashës ka qenë gjithmonë e njëjtë, “dera e partisë mbetet e hapur për këdo që këkron të japë kontributin e tij kundër keqqeverisjes së Edi Ramës”.
Dje Edi Rama doli para shqiptarëve për t’iu përgjigjur një komenti që i drejtohej me etiketimin “o pall” se përse e kishte propozuar Ritvan Boden si anëtar të Këshillit Mbikëqyrës të BSH-së.
Ndër të tjera Rama shpjegoi sesi në kohën e tij te lirë ndërsa mendon si të tallë pallën me opozitën dhe “opozitarët”, ai u kujtua që diku në celularin e tij kishte dhe numrin e Ritvanit dhe ashtu i hargalisur e ka pyetur si fjala vjen Sandër Lleshin para disa ditësh “o Ritvan a do të të fus tek Këshilli Mbikëqyrës i BSH-së?”.
Rama na rrëfen se oferta e tij krejt “bujare” dhe krejt “e siqertë” është pritur pozitivisht nga z. Bode “voila” Ritvani është sot në krye të listës së propozuar nga Edi Rama dora vetë për Këshillin Mbikëqyrës të BSH. Pra, ish Sekretari i Përgjithshëm i PD-së thjeshtë ka pranuar ofertën e Kryeshkatërrimtarit të ekonomisë, financave, arsimit, kulturës, moralit, rendit, arsimit, integrimit dhe depopullimit të Shqipërisë për inat të Lulzim Bashës?!…
Lulzim Basha sot mendoj se ështe në nevojë për ndonjë qëndrestar që nuk i lëkunden gjunjët para çdo oferte të fëlliqur nga Edi Rama (besoj unë). Po sa për modelin e mësipërm, këta me vetëm një sms larg, po rezultojnë e vetmja lëvizje e qëmtuar nga Lulzim Basha këto 5 vjet për t’i mbajtur larg…
