Moderatori i emisionit thotë se gabimi i vetëm i Tunës është se nuk ka frikë dhe është e sinqertë në ato që thotë.
Mamaqi shprehet se do të dëshironte që në emision të ketë më shumë personazhë të tillë, që siç thotë ai për Tunën, “të çarmatos me sinqeritetin”.
“Pashë histerinë e atyre që duan të shohin vetëm njerëz në kornizë, të rrinë drejtë, të flasin të shtirur, të mos qeshin shumë dhe nuk e durojnë dot një artist që të lëshojë pak veten. Por kjo është Tuna, nuk e kursen kurrë veten si në performanca artistike, si në raportin me publikun, dhe në fund është shumë më e vërtet, se ata që nëpër emisione japin vetëm përgjigje për të ruajtur imazhin. Personalisht unë e shijova shumë… edhe çifti e shijoi.
Edhe ju që bëni moral e shijuat më shumë, meqë siç e tha dhe Tuna, jeni më të interesuar në hallet familjare të personazheve se sa në karrierën e tyre. Ama keq kur i fshehin, e keq kur ua shuajnë kuriozitetin.
Gabimi i vetëm i Tunës është, që duke e ditur që gjithmonë figura e femrës masakrohet dhe fajësohet për të gjitha problemet familjare, ajo nuk ka frike! Nuk përpiqet të manipulojë publikun duke u shtirur, por të çarmatos me sinqeritetin, edhe atëherë kur thotë me zë gjëra që guxojmë t’i mendojmë vetëm në fshehtësi. Uroj të kem në emision më shume të ftuar të tillë“, shkruan Ermal Mamaqi.
Tuna mbrëmë në emision foli ndër të tjera për mosmarrëveshjen që ka me kunatin e saj, Robert Berishën. Ndërsa e pyetur nga moderatori Ermal Mamaqi nëse do të shkojë tek emisioni “Rudina”, ajo mohoi që ta bënte. Kjo deklaratë e saj nxiti reagimin e Rudina Magjistarit, e cila tha për Tunën se “ka shumë urrejtje në shpirt”.
