Enver Bajri u ndalua sot në Spanjë, konfirmuan burime zyrtare nga Policia e Shtetit.
“Policia e Shtetit, në koodinim të plotë dhe intensiv të veprimeve me Policinë Spanjolle dhe Policinë Italiane kanë arritur të ndalojnë pak minuta më parë shtetasin në kërkim ndërkombëtar Enver Bajri. Bajri dyshohet se është drejtuesi i grupit kriminal ‘Bajri’, që ishte aktiv kryesisht në zonën e Shkodrës dhe u godit disa javë më parë nga Policia e Shtetit në një operacion të gjerë. Enver Bajri u ndalua rreth orës 11:30 minuta të ditës së shtunë në San Huan, Alicante, Spanjë. Policia e Shtetit ishte në gjurmim të tij, duke përdorur metoda speciale të hetimit dhe në bashkëpunim me agjencitë e huaja ligj zbatuese, arritën të konkretizonin kërkimin me arrestimin e tij. Bajrit në momentin e ndalimit iu gjet një armë pistoletë, që e mbante pa leje dhe rreth 9 mijë euro. Ai është i dënuar edhe në Itali me 6.6 vite burg për veprat penale të ‘Organizim i emigracionit të paligjshëm’, ‘Shfrytëzim prostitucioni’ dhe ‘Falsifikim’”, thuhej në njoftim të Policisë së Shtetit.
Kush është Enver Bajri?
Burimet bëjnë me dije se ai për një kohë të gjatë ka qëndruar në Belgjikë, ku kontrollonte veprimtarinë e grupit kriminal “Bajri” në fushën e trafikimit të lëndëve narkotike dhe gjobë vënieve.
45-vjeçari merrej me trafik drogash të forta, që i merrte nga Amerika Latine dhe i transportonte drejt vendeve të Bashkimit Europian. Gjithashtu Enveri ka qenë edhe personi që kontrollonte financat e këtij grupi kriminal dhe ishte dora e hekurt që drejtonte rrjetin e prostitucionit.
Grupi Bajri, sipas informacioneve te ndryshme hetimore, dyshohet se ishte i përfshirë në vrasje, gjobëvënie dhe trukim ndeshjesh sportive. Ndërkohë kujtojmë se si pjesë e kësaj bande u arrestuan 11 persona, më 21 shtator te 2018, të cilët dyshohet se merreshin me trafik droge dhe vepronin në Tiranë, Shkodër, Holandë dhe Belgjikë.
Ndërsa këtë të shtunë është bëri i mundur dhe arrestimi i kryekapos së bandës “Bajri” ne Spanjë.
