Prej disa javësh tashmë i gjithë diskursi publik i qeverisë Rama është dedikuar te mbyllja e kazinove, dhe basteve online me qëllimin e bërë publik, ndaljen e një plage sociale për të gjithë familjet shqiptare.
Koha e zgjedhjes së këtij aksioni është zgjedhur pikërisht tani, kur qeveria shqiptare nuk ka pasur ditët e saj të mira, ndërsa eksponentë të saj janë përfshirë në disa skandale me drejtësinë dhe me përgjime që kanë të bëjnë me krimin.
Problemi i vetëm që shtrohet këto ditë është nëse kompanitë e basteve dhe të lojërave të fatit do të mbyllen të gjitha, apo ky aksion bëhet për të favorizuar monopolin online?
Zërat thonë se e gjitha kjo bëhet për të favorizuar një kompani të vetme që është Bastarena, për të cilët pretendohet se ka pjesë dhe Olsi Rama dhe Vangjush Dako.
Vetë kryeministri Rama i ka rrëzuar këto zëra në disa dalje të herëpashershme televizive, duke thënë se për bastet online do të ketë një aksion të dytë.
‘’Ne do punojmë për regjimin e ri të basteve online. Ne kemi ngritur një grup pune dhe në 31 dhjetor do mbyllen të gjitha duke përfshirë edhe këtë monopolin online. Do kemi një garë të hapur për këtë treg. Kam parë shumë përpjekje se do intestifikohen. Po i heqim miliarda krimit të organizuar. Një pjesë janë kompani ku fshihet një segment i krimit të organizuar. Më shumë se 95% e atyre që luajnë, nuk do luajnë më pas mbylljes.
Kryeministri Rama: Tek online është një gjë, e cila nuk mund ta bëjë kushdo. Por, duhet kartë identiteti, kartë bankare, por fondet vijnë nga bankat. Taksimi i lojtarit fitues, është i taksuesshëm. Më shumë se 95 për qind e atyre që kanë luajtur, tashmë nuk do të kenë kohë për të luajtur. Me 1 janar do të mbyllen të gjitha”, është shprehur Rama pak ditë më parë.
Nga ana tjetër sot në Komisionin e Ekonomisë ka kaluar projektligji për lojërat e fatit, që sipas Erion Braçes sjell mbylljen e padiskutueshme të të gjitha formave të lojërave qoftë elektronike dhe qoftë fizike.
“MBYLLEN TE GJITHA; BASTE, BASTE DHE KAZINO ONLINE, LOJRA ELEKTRONIKE-MAKINA E KAZINO,
BINGO, VLT;
Edhe nje here;
Lojrat elektronike ne distance ketu dhe aksesi nga ketu jashte!
Reklamat po e po, tani reklama per Baste ndalohen edhe gjate aktiviteteve sportive.
Por edhe me shume, prej Nenit 1; AKTIVITETI I LOJRAVE TE FATIT TANI E NE VIJIM PERGJEGJESI E SHTETIT!”, shkruan Braçe.
Ndërkohë që kompania Bastarena është e bindur se aktiviteti i saj është brenda rregullave dhe ligjit shqiptar, dhe se ndryshimet në projekligj nuk prekin aktivitetin online.
“Në zbatim të masave të marra nga qeveria, duke filluar nga data 1 janar 2019 do të pushojnë së funksionuari të gjitha kazinotë elektronike si dhe pikat e basteve/llotot, përvec atyre online. Bastarena, si e vetmja kompani e licensuar e lojrave të fatit online nuk preket nga këto ndryshime. Bastarena ju siguron se llogaritë tuaja janë plotësisht të sigurta dhe ju fton të luani dhe të argëtoheni”, shkruan kompania në përgjigjen e saj ndaj ndjekësve dhe interesimit të madh të tyre.
Ndërkohë që për të zgjedhur se kë duhet të besojmë, na mbetet të presim 1 Janarin se cili version do të aplikohet.
/Faxweb/
