Ndërsa Ministrja e Drejtësisë, Etilda Gjonaj, i kërkon KLD-së të zhbëjë vendimin ose ndryshe paralajmëron padi në gjykatë, gjyqtari Gjin Gjoni në një reagim për mediat hedh poshtë pretendimet.
Ai thotë se mbledhja është zhvilluar në korrnizë të ligjit, ndërsa shton se ministrja nuk është e informuar pasi ka munguar në mbledhje. Gjin Gjoni thotë se kërkesa e tij për leje prindërore është bërë brenda kornizës ligjore. Sa i takon pretendimit të ministres së Drejtësisë se gjyqtari kërkon t’i shpëtojë Vettingut, Gjin Gjoni thekson se Etilda Gjonaj nuk njeh procedurën. Ai thotë se është i gatshëm t’i nënshtrohet Vettingut kurdo që të kërkohet nga KPK.
Reagimi i gjyqtarit Gjin Gjoni:
Një sqarim për deklaratën e sotme të Ministres së Drejtësisë:
Kërkesa e paraqitur nga unë pranë Këshillit të Larte të Drejtësisë është në përputhje të plotë me nenin 24 te ligjit 96/2016. Deklarata e sotme e Ministres së Drejtësisë është e pasaktë dhe tendencioze.
Së pari,unë nuk kam marë pjesë në votim dhe për marrjen e vendimit ka qene korumi i plotë, aq sa e kerkon ligji. Nëse ministrja ka munguar në këtë mbledhje,mund të informohet me saktesi nga procesverbali që është mbajtur gjatë zhvillimit dhe votimit. Ministrja e Drejtësisë është vetëm një votë në KLD dhe nuk drejton as Këshillin e Lartë të Drejtësisë dhe as mbledhjet e tij. I kujtoj zonjës Gjonaj se dhënia e lejes është një praktikë dhe qëndrim i mbajtur nga KLD edhe më parë.
Së dyti, Ministrja e Drejtësisë është anëtare e një qeverie e cila sapo ka shpallur “paketën antishpifje” ndaj i takon të jetë më e kujdesshme kur deklaron shpifje publike.
Së treti, leja që më ka dhënë KLD për arsye familjare, as nuk e pezullon dhe as e shtyn porçesin e vetting-ut. Kjo do të do te thotë që unë jam i gatshem të paraqitem kur të kërkohet për këtë proçes. Shpreh keqardhjen që Ministrja e Drejtësisë,për pozicionin e rëndësishëm që ka nuk e njeh proceduren dhe i kujtoj ndërkohë se ligji dhe proçedurat e vetting-ut janë të qarta dhe askush nuk mund të fshihet apo t’i përdorë ato për qëllime politike.
Gjin Gjoni