Për analistin dhe gazetarin Andi Bushati, nisma e kryeministrit Edi Rama për paketën anti-shpifje, po bëhet për të mbuluar skandalet. Në emisionin “Të Paekspozuarit” në News 24, Bushati tha se, Rama ka vepruar njësoj edhe në raste të tjera, për të tërhequr vëmendjen nga problemet më të mëdha.
“S’besoj se çdo kokë njeriu normal ka që janë pro shpifjes dhe që janë anti shpifjes, po besoj që e ka një lojë politike, një shashkë që hedh në mjedis për disa arsye. Sot, në ligjin shqiptar për shpifjen dënohesh rëndë. Unë kam shkuar në gjykatë (fatmirësisht qëlloi një trup gjykues i paanshëm dhe dola fitues) më kërkonin 100 milionë lekë, kjo është një shifër që i shkatërron jetën biznesit, etj..”, tha Bushati, “në shpifjen e kemi të dënueshme, ç’duhet një fabul tjetër kur ne e kemi esencën”.
“Për portalet u bë një listë nga AKEP me urdhër të Ramës me media online që ishin më herët të legalizuara. Kur ti do provokosh atëherë duhet të hedhësh në treg një debat shterpë”, tha analisti teksa më pas përmendi shfaqen e Ramës në emisionin “Dritare” më herët gjatë kësaj jave. “Kryeministri i tha gazetarëve ‘shpifës’, ‘shpifës’, ‘shpifës’, për të ngulitur një ide që këtu ka një luftë më madhe”.
“S’ka pse të dalë çdo ditë në televizon”, shtoi. “Sa herë ka pasur beteja kundër shpifjes ka qenë gjithmonë kur ka pasur një problem më të madh për zgjidh”, tha. Këtu u ndal te momenti kur u refuzua kërkesa e prokurorisë që Tahirit ti hiqej imuniteti.
“Pashë lajmet e asaj dite, që Rama refuzoi ti heqë imunitetin Tahirit, që doli e më pas sulmoi mediat”, tha Bushati, “mediat merreshin me ‘ç’është ky kryeministër’”… dhe u anashkalua ngjarja që Rama refuzoi ti hiqte imunitetin Tahirit.
Bushati u ndal te një tjetër rast, kur një gazetare i bëri një pyetje Kryeministrit gjatë një deklaratë për mediat, se, “a nuk mund të vendosë një ministër të Brendshëm që të mos jetë i lidhur me krimin”.
Rama, vijoi Bushati, bëri një show, la gjithë debatin, dhe prapë vëmendja mediatike shkoi te sjellja e kreut të qeverisë.
Kjo po ndodh edhe tani, sipas gazetarit.
“U kap prokuroria në flagrancë duke i shërbyer Ramës dhe tha sa të merren të gjithë me këtë, hajde të marr kostumin e një satrapi dhe të merren me këtë tjetrën”, tha Bushati.
