Jetëgjatësia në vitin 2040 pritet të rritet në të gjithë botën, por klasifikimet e deritanishme do të shkunden, me Spanjën që do të dalë e para në renditje, ndërsa Kina dhe SHBA do të këmbejnë vendet.
Sipas kërkuesve, me një jetëgjatësi mesatare prej 85.8 vitesh, Spanja, e cila më herët ka qenë në vendin e katërt, do të rrëzojë nga froni Japoninë, që kryeson aktualisht me një jetëgjatësi mesatare prej 83.7 vitesh.
Ndërkohë, në një ndryshim që nga shumëkush mund të mendohet se reflekton ndryshimin e balancave të fuqisë, dy ekonomitë më të mëdha të botës do të këmbejnë pozicionet; Shtetet e Bashkuara do të bien nga vendi i 43-të në atë të 64-t, me 79.8 vite jetëgjatësi mesatare, ndërsa Kina do të ngjitet nga vendi i 68 në të 39-in, me 81.9 vite jetëgjatësi mesatare në vitin 2040.
Sipas studiuesve, kjo ngritje e Spanjës vjen mbi të gjitha për shkak të dietës mesdhetare që ndiqet atje. Të njëjtat tendenca të rritjes së jetëgjatësisë mesatare kanë edhe vendet e tjera të Europës Jugore dhe asaj Juglindore, ku bën pjesë edhe vendi ynë.
Përveç stilit të jetesës, faktorë të tjerë që ndikojnë te jetëgjatësia janë edhe sëmundjet, ndotja e ajrit, duhanpirja etj..
