Shefja për Politikë të Jashtme në BE, Federika Mogerini shprehet se marrëveshja e Prespës është mundësi e veçantë, e cila ndoshta edhe nuk do të përsëritet. Mesazhi vjen një ditë para fillimit të seancës kyçe parlamentare, ku do të vendoset nëse do të votohen ndryshimët kushtetuese apo do të shkohet në zgjedhje të parakohshme.
Në një intervistë për agjencinë e lajmeve MIA, ajo fillimisht sqaroi se e kupton ndjeshmërinë dhe prapavijën historike të kontestit.
“Kontesti nuk u zgjat aq shumë pa arsye, mirëpo siç e pamë në të kaluarën, sa më shumë kohë kalon, aq më vështirë mund të gjendet zgjidhje. Procesi bisedues patjetër që ka qenë i dhimbshëm dhe rezultati është kompromisi i arritur. Por, është kompromis me të cilin me sukses plotësohen interesat kyçe të të dyja palëve”, deklaroi Federika Mogerini.
Menjëherë pas kësaj, Mogerini thekson se qëndrimi i BE-së është i qartë – mbështetje e plotë për marrëveshjen e arritur me Greqinë.
“Kjo është një mundësi unike për pajtimin në Ballkanin Perëndimor, e cila mund të mos përsëritet. Shpresoj që të gjitha palët ta kapin momentin dhe se do të sigurojnë një të ardhme në BE për vendin, një të ardhme që i gjithë kombi shpreson vite me radhë që të bëhet realitet“, shtoi ajo.
E pyetur nëse marrëveshja e Prespës do të përshpejtonte integrimin në BE, Mogerini thotë se ajo është një mundësi për të çuar përpara rrugën drejt Bashkimit. Ajo shton se përparim i rëndësishëm është i mundshëm nëse përdoret me mençuri momenti për të përparuar me reformat e nevojshme.