Drejtor i Politikave Fiskale në Ministrinë e Financave, Niko Lera, deklaroi se në Shqipëri nuk do ketë as baste online, pas mbylljes së pikave të basteve sportive, pas 1 janarit 2019.
“Edhe bastet online do të jenë pjesë e kësaj mase, pra nuk do të luhet as online. Shteti, administrata që do të lancojë një masë të tillë, ka edhe detyrimin ligjor të kontrollojë zbatimin e kësaj masa. Pra organet ligjzbatuese të këtij vendi, tatimet apo policia do të jenë në funksion të zbatimit të këtij ligji”, deklaroi Drejtori i Politikave Fiskale në Ministrinë e Financave.
Në përfundim Lera theksoi edhe një herë se një mënyrë e organizimit mund të jetë organizimi nëpërmjet një monopoli shtetëror, një opsion tjetër mund të jetë organizimi përmes një kontrolli të rreptë të pagesës, apo futjes në lojë përmes kartës së identitetit të çdo personi nëse është në moshën e lejuar.
Mbyllja e pikave të basteve sportive në të gjithë vendin, përveç efekteve në buxhetin e shtetit, pritet të sjellë edhe efekte të theksuara sociale, pasi do të dalin të papunë rreth 7300 të punësuar aktualisht, të cilët rezultojnë të regjistruar te zyrat e tatim-taksave.