Policia e Tiranës ka shoqëruar 20 persona për atentatin me armë të mbrëmjes së djeshme (4 tetor 2018) në zonën e ish-Bllokut, ku mbeti i vrarë Rigers Gaxha dhe u plagosën Ervis Martinaj dhe Laert Hasa.
Burimet nga grupi i hetimit bëjnë me dije se në atentat janë përdorur 2 pistoleta. Nga ana e bluve po punohet për zbardhjen e rrethanave të ngjarjes, identifikimin dhe kapjen e autorit.
Ngjarja u shënua rreth orës 21:30 të së enjtes kur një person ende i panjohur ka qëlluar në distancë të afërt ndaj tre personave.
Si pasojë ka humbur jetën Rigers Gaxha, ndërsa të plagosur kanë mbetur 34 vjeçari Ervis Martinaj dhe Laert Hasa. Raportohet edhe per nje te trete te plagosur por kjo nuk konfirmohet nga policia zyrtarisht.
Prokuroria dyshon se në qendër të sulmit me armë ishte Martinaj. Kjo dhe për shkak të precedentëve të mëparshëm penal që ai ka pasur.
Sulmi ka ndodhur në një nga lokalet e njohura në qendër të kryeqytetit në një ambient të veçuar.
Pas ngjarjes zona e ish-bllokut është blinduar nga forcat e policisë. Po ashtu masa shtesë janë vendosur dhe në zonën e Spitalit Ushtarak.
