Atalanta mori një pikë shumë të rëndësishme në “San Siro” duke shënuar golin e barazimit në minutën e katër shtesë, atëherë kur të gjithë te Milani mendonin se kishin siguruar tri pikët. Gonzalo Higuain dhe Jack Bonaventura shënuan dy golat për kuqezinjtë, por gjithashtu shpërdoruan shumë raste, që mund të kishin vulosur fitoren për skuadrën e Genaro Gattusos.
Argjentinasi goditi shtyllën vetgëm tre minuta nga fundi i kohës së rregullt, para se Emiliano Rigoni të përfitonte nga një top në zonë për të barazuar resultatin.
Ndeshja nisi më së miri për Milanin, pasi Higuain shënoi që në minutën e dytë një supergol fluturimthi duke përfituar në maksimum nga një pasim tepër i saktë i Susos. Spanjolli do të ishte vendimtar edhe në golin e dytë të realizuar nga mesfushori italian, pasi i dha një top fantastik duke e nxjerrë në pozicion për të shkëlqyer për të shënuar.
Gomez barazoi përkohësisht për bergamaskët, por miqtë nuk mundën të dëmtonin më shumë skuadrën e Genaro Gattusos. Për t’u përmendur vendimi i trajnerit Gasperini për të mos përfshirë në formacion as Etrit Berishën por as Berat Djimsitin. Dy lojtarët e kombëtares shqiptare e panë ndeshjen nga stoli.
Pas golit të parë, Milani pati edhe mundësi të tjera, por fillimisht Bonaventuras iu mohua goli nga Goillini, ndërsa Higuain arriti të shënonte, por rrjeta e tij u gjykua e realizuar në pozicion jashtë loje dhe u anulua nga sistemi VAR.
Rafal Toloi vuri në vështirësi mbrojtjen e Milanit kur për pak sa nuk shënoi në minutën e 34’, por Bonaventura dhe Higuain u kundërpërgjigjën me dy raste mjaft të mira, të pashfrytëzyara si duhet.
Në pjesën e dytë Atalanta krijoi sërish raste për të shënuar dhe pas një pritje të mrekullueshme të Donnarummas ndaj gjuajtjes së Zapatas, portieri italian e kishte të pamundur të ndalte topin të përfundonte në rrjetë katër minuta më vonë, pas gjuajtjes së Gomez.
Kuqezinjtë shpërdoruan shumë deri në fund dhe më pas u ndëshkuan për të humbur një mundësi tepër të mirë për t’u larguar nga vendet e ulëta në renditjen e përgjitshme të Serie A.