Nga Boldnews.al
Në ditët e parë të vitit të ri shkollor, 16 mësues të shkollës fillore të Çermës, në Lushnje, u pezulluan nga detyra, me vendim gjykate, pasi akuzohen nga Prokuroria e këtij qyteti për fallsifikim dokumentash.
Pas këtij zhvillimi, reagoi menjëherë Ministria e Arsimit e Lindita Nikollës, e cila tentoi të hiqte përgjegjësinë nga vetja për këtë rast skandaloz. Në një njoftim zyrtar të ministrisë së Nikollës, thuhet se “….hetimi i prokurorisë ka nisur prej shumë kohësh dhe fallsifikimet i takojnë periudhës 2010-2013…”.
“Boldnews.al”, nëpërmjet burimeve të saj, zbuloi se qëndrimi i ministres Nikolla është tërësisht i gënjeshtërt. Në vendimin e gjykatës së Lushnjes thuhet se Prokuroria ka nisur hetimin për fallsifikimin e dokumentave në shkollën e Çermës në vitin 2017. Rastet e fallsifikimit përfshijnë periudhën 2013-2016 dhe kallëzimi nuk është bërë as nga Ministria e Arsimit, as nga Drejtoria Arsimore e Lushnjes, por nga një qytetar.
Në bazë të të dhënave, të cilat gjenden në vendimin e gjykatës, 16 mësuesit e shkollës 9-vjeçare të fshatit Çermë, në bashkëpunim me njëri-tjetrin, kanë rritur në mënyrë fiktive numrin e nxënësve që frekuentojnë këtë shkollë, me qëllim që të mbanin hapur klasa, më shumë se sa kishte nevojë ajo shkollë.
Ky fallsifikim ka vijuar për 3 vite rresht, në periudhën 2013-2016, pikërisht në kohën që Ministria e Arsimit drejtohet nga socialistja Lindita Nikolla. Hetimi i Prokurorisë së Lushnjes, krahas përgjegjësisë penale të personave përgjegjës, zbuloi edhe dështimin total të strukturave drejtuese arsimore, përfshirë edhe Ministrinë e Arsimit.
Së pari, Drejtoria Arsimore e qytetit ka dështuar plotësisht, pasi nuk ka evidentuar në 3 vjet rresht këtë fallsifikim që kryhej në qytetin e Lushnjes. Gjithashtu, edhe Ministria e Arsimit ka dështuar totalisht, pasi, siç rezulton, nuk ka kryer asnjë lloj inspektimi apo verifikimi në shkollën e fshatit Çermë, mësuesit e të cilës e kanë trajtuar institucionin arsimor si pronë të tyre.
Ministrja Nikolla shkon akoma më larg kur, nëpërmjet njoftimit zyrtar, mundohet të shmangë përgjegjësitë e saj direkte si titullare dhe ia atribuon faktet penale një periudhë të shumë viteve më parë (2010-2013).
Në fakt, siç tregojnë edhe dokumentat e gjykatës së Lushnjes, hetimi që u pasua me pezullimin e 16 mësuesve, përfshin periudhën 2013-2016. Ky hetim ka nisur në bazë të kallëzimit të një shtetasi, i cili, siç ka pohuar edhe vetë, ka vënë në dijeni për faktet skandaloze edhe drejtuesit më të lartë arsimorë lokalë dhe në ministri.
Deri në nisjen e hetimit zyrtar nga Prokuroria e Lushnjes, asnjë prej institucioneve arsimore nuk e ka vlerësuar si duhet informacionin e përcjellë për fallsifikimet që ishin kryer në shkollën 9-vjeçare të Çermës.
Vetëm pasi gjykata vendosi pezullimin e tyre nga detyra, Ministria e Arsimit, për të mbuluar dështimin e saj, nxitoi të shpërndante një njoftim zyrtar, i cili ishte i mbushur me informacione që nuk përputhen me realitetin, si përsa i përket periudhës kur janë kryer fallsifikimet, ashtu edhe për kohën kur ka nisur hetimi i Prokurorisë së Lushnjes.
