Todi Vila tregon për emisionin “Stop” se ka vetëm një peng në jetë, të bijën e sëmurë. 80-vjeçari thotë se nuk do të mbyllë sytë, pa sistemuar vajzën e tij, Anën, që është me sindromën “Down”.
Ai jeton vetëm me të, pasi bashkëshortja ka ndërruar jetë. 80-vjeçari tanimë është i pazoti për t’i shërbyer Anës, ndaj apelon për një zgjidhje nga institucionet e kujdesit.
“Kërkoj që të më japin të paktën kujdestarinë ose një institucion që ta çojnë të jetojë atje. Ama 80 vjeç.. është një moshë që vdekja nuk ka lajmërim. Nuk mundem ta lej. Ku ta lej? Një njeri të sëmurë nuk ta merr njeri…”, shprehet zoti Vila i përlotur.
Emisioni ”Stop” shkon në shtëpinë e tij me përfaqësuesin e Shërbimit Social të Bashkisë Fier, Enri Lulaj.
“Po të ketë një qendër që është për të, unë jam dakord. Unë nuk mundem, por nuk e heq nga vetja. Nuk mundem… nuk i shërbej dot më…”,shpjegon Todi Vila.
Enri Lulaj premton se do të mundohen të gjejnë një zgjidhje për këtë çështje.