Radja Nainggolan mund të quhet tashmë i rikuperuar dhe një alternativë më shumë për Luciano Spallettin, duke filluar që nga ndeshja e të dielës në mbrëmje, në “San Siro” ndaj Torinos.
Mesfushori belg i ardhur këtë verë me shumë bujë te Interi, u dëmtua në një miqësore në mes të muajit korrik dhe që prej atëherë ishte stërvitur veçmas grupit.
Pikërisht për këtë arsye, Nainggolan mungoi në ndeshjen debutuese ndaj Sassuolos, ku Interi doli nga “Mapei Stadium” me një humbje minimale 1-0.
Gjithsesi tashmë çdo gjë duket e shkuar sepse Nainggolan dje kreu stërvitjen e parë me grupin e lojtarëve dhe sot gjithashtu tregoi se ka lënë pas dëmtimin. Përveçse u stërvit me grupin, belgu mori pjesë sot edhe në minindeshjen e zhvilluar brenda ekipit, duke treguar një gjendje të mirë fizike.
Gjithsesi pritshmëritë janë që Nainggolan të grumbullohet për sfidën me Torinon dhe ta nisë nga stoli, për t’u përdorur në ndeshje e sipër, nëse do të jetë e nevojshme, pasi Spalletti nuk ka ndërmend të rrezikojë aspak.
Interi do të kërkojë të marrë fitoren e parë në kampionat ndaj Torinos, teksa pavarësisht humbjes ndaj Sassuolos, tifozëria zikaltër nuk ka ndalur së konfirmuari mbështetjen.
Edhe të dielën në mbrëmje, në shkallët e “San Siros” pritet të ketë rreth 60 mijë tifozë.