Trajneri i Real Madridit, Julen Lopetegui, ka lënë të kuptohet se Mateo Kovacici do të largohet nga klubi madrilen pas interesimit të Chelsea, por ka thënë se nuk ka asnjë mundësi që Luka Modrici të largohet.
Për të dy kroatët ka pasur interesime nga klubet e mëdha evropiane. Kovacici është shumë afër transferimit në Chelsea si huazim. Për ta arritur këtë marrëveshje, ai ka refuzuar të ushtrojë së bashku me pjesën tjetër të skuadrës së Real Madridit.
Ndërsa, është raportuar se Modrici dëshiron të largohet nga klubi madrilen dhe Interi janë shumë të interesuar për t’i siguruar shërbimet e tij. Megjithatë, edhe trajneri edhe presidenti i klubit e kanë bërë të ditur se nuk do ta lejojnë largimin e tij.
“Epo mirë, unë nuk mund të flasë asgjë për diçka që nuk ka ndodhur ende. Asgjë nuk është vendosur. Por, nëse kjo ndodhë, atëherë ne do të kërkojmë zgjidhje dhe do të sigurohemi se skuadra jonë është e balancuar”, ka thënë Lopetegui kur u pyet për mundësinë e largimit të Kovacicit nga Real Madridi.
“Luka Modric? Unë mund të ju siguroj se ai do të jetë pjesë e skuadrës sonë. Presidenti ynë, Florentino Perez, e ka shprehur këtë shumë qartësisht”.
