Nga Boldnews.al
Ish-ministri i Brendshëm, Saimir Tahiri, nën akuzë për bashkëpunim me trafikantë droge, u përmend sot në dy zhvillime të ndryshme, ndërkohë që i gjithë debati politik është përqëndruar në vendimin e qeverisë për prishjen e Teatrit Kombëtar.
Paraditen e së Enjtes, ambasadori në ikje, Donald Lu, u shfaq në një paradë suksesesh të Ministrisë së Brendshme. Në këtë takim, diplomati përmendi për të disatën herë listën e personave publikë ose politikë që kanë çështje penale të hapura. Shkarazi, si përherë, Donald Lu përmendi edhe Saimir Tahirin, si një ndër politikanët që është nën hetim.
Pak orë më vonë, në media u përhap informacioni se Prokuroria e Apelit për Krime të Rënda ka dorëzuar rekurs në Gjykatën e Lartë, ku kërkon caktimin e masës “arrest në burg” për Saimir Tahirin, kërkesë e cila nuk u pranua nga Gjykata e Apelit për Krime të Rënda.
Të dy zhvillimet, njëri më pa brumë se tjetri, tentuan të rikthejnë në skenën publike emrin e ish-ministrit kampion, me qëllimin e vetëm për të zhvendosur vëmendjen nga pika kulminante e debatit politik-arrogancën e qeverisë për të shndërruar hapësirën publike në qendër të Tiranës në një biznes të dyshimtë fitimprurës për qeveritarët.
Donald Lu, i cili para pak ditësh ishte para Senatit, ku diskutohej për kandidaturën e tij si ambasador në Kirgistan, nuk e humbi rastin të ishte i pranishëm në “paradën e sukseseve” të Ministrisë së Brendshme. Ai përmendi si arritje kapjen e 613 kg kokainë në shkurt 2018, zbulimin e 3.4 milionë euro në qershor 2018. Përmendi Frrokun, Prengën, Rroshin, ish-eksponentë të Partisë Socialiste, të cilët nuk janë më në jetën publike. Përmendi Klemend Balilin, duke kritikuar qeverinë, policinë e prokurorinë për mos-arrestimin e tij.
Madje, tek emri i Balilit, ambasadori Lu u ndal më gjatë, duke kujtuar se ai ka lidhje politike. Ky është një fakt i njohur. Por, më shumë lidhje politike ka Saimir Tahiri, për të cilin, Donald Lu thjesht i përmendi emrin.
Edi Rama, i pranishëm në këtë takim, natyrisht që nuk mund të humbiste rastin për të prodhuar një debat shterpë. Ai i “sqaroi” Lu-së se Klemend Balili nuk ishte pjesë e formacionit të tij politik. Mediat pranë qeverisë e kapën menjëherë mesazhin dhe shpërndanë titujt se “Edi Rama i kundërpërgjigjet Donald Lu”. Por, asnjë fjalë nuk tha Kryeministri për Saimir Tahirin, njeriun e tij më të afërt gjatë mandatit të parë qeveritar.
Në zhvillimin e dytë, Prokuroria e Apelit për Krime të Rënda, me shumë mundësi për procedurë, ushtroi të drejtën e rekursit ndaj rrëzimit të masës së sigurisë për Saimir Tahirin nga Gjykata e Apelit për Krime të Rënda.
Nëse kjo nuk është një tentativë e sforcuar e prokurorit të çështjes, ajo është një skenar i rëndomtë i organit të Prokurorisë. Pas caktimit të Arta Markut si Prokurore e Përgjithshme e Përkohshme, institucioni kryesor i hetimit ka ecur në të kundërt të rolit të tij. Prokuroria ka kryer një seri veprimesh, të cilat lehtësojnë pozitën proceduriale të ish-ministrit të Brendshëm.
Fillimisht u ekstradua në mënyrë të paligjshme një prej personave kyç të hetimit, i cili mund të shndërrohej në një të penduar të drejtësisë. Më pas u largua në mënyrë anti-ligjore drejtuesi i Prokurorisë për Krime të Rënda, i cili ishte edhe prokuror i çështjes kundër Saimir Tahirit. Pra, veprimet e deritanishme të Prokurorisë së Përgjithshme në favor të Tahirit nuk mund të mbulohen me një rekurs në Gjykatën e Lartë, e cila tashmë është nën ethet e Vetingut.
Këto zhvillime, të cilat nuk duket se do i prishin qetësinë Saimir Tahirit, i cili po mëson se si mund të notosh me kalë në Gjirin e Lalëzit, ndodhën pikërisht në ditën kur Parlamenti shqiptar është përfshirë nga debati mbi vendimin tashmë definitiv të qeverisë për prishjen e Teatrit Kombëtar.
