Antoine Griezmann ishte autori i golit të parë në fitoren e Francës 4-1 kundër Argjentinës ndërsa “Gjelat” u kualifikuan në çerekfinale të Kupës së Botës ku do të përballen me Uruguain. “Unë shpresoj që Mbappé të vazhdojë kështu, ne duhet t’i japim atij topin dhe hapësirat që ai ka nevojë dhe ai nuk do të ndalojë së shënuari”, tha ai për mediat. Sulmuesi i Atlético Madrid vlerësoi triumfin e ekipit të tij dhe mbi të gjitha, efektivitetin përpara portës: “Ne e kemi ndarë dominimin në fushë, por ne kemi arritur të konkretizojmë shanset tona dhe ky ka qenë ndryshimi”. Griezmann foli edhe për Spanjën dhe vlerësoi çështjen e Lopetegui: “Spanja ka ndryshuar trajnerin e saj dhe kjo ishte e vështirë. Pavarësisht kësaj, mos e vini në dyshim që ata do të bëjnë diçka të bukur”.
Për numrin ‘7’ të Francës, çelësi i sukesit ishte se ekipi i tij e dinte se si të bllokonte Leo Messi-n shumë mirë dhe kjo gjë ndihmoi shumë. “Ne e dimë se shumë francezë na shikojnë dhe presin shumë prej nesh, ka ndeshje pak më të dobëta si ajo me Danimarkën dhe ndeshje të tjera më të mira si sot”, tha ai. “Mbappé bëri diferencën me penalltinë e fituar dhe dy golat e tij, është shumë mirë për ne. Kemi pasur momente të vështira në të cilat ata ishin superiore, por ne ditëm si të menaxhonim ndeshjen. Kishim një ekip shumë të vështirë për të kapërcyer”, theksoi sulmuesi francez.
Qendërmbrojtësi i Real Madridit, Varane gjithashtu vlerësoi triumfin e Francës dhe performancës brilante të Mbappé. “Ai është një lojtar i madh pavarësisht nga mosha e tij e re. Ai di si të përfitojë nga cilësitë e tij si një sprintier (i shpejtë) dhe golashënues. Ne jemi shumë të lumtur që e kemi atë në skuadër”. Varane, si bashkatdhetari i tij Griezmann, e përshkroi Spanjën si kandidate për të fituar Kupën e Botës. “Spanja vazhdon me lojtarë të mirë, me stilin e lojës dhe me përvojën e saj”, tha mbrojtësi francez.