Artistët kanë vijuar edhe sot protestën për të mbrojtur Teatrin Kombëtar të cilin qeveria kërkon ta shembë.
Në fjalën e tij aktori Arben Derhemi i ka kthyer përgjigje kryebashkiakut Erion Veliaj të cilin e konsideroi si njeri të PD-së, duke u shprehur me ironi se “Sot jam njeriu më i lumtur në botë se mora vesh nga kryetari i Bashkisë se me kë parti isha”.
Ai deklaroi se nuk kishte pranuar të shkonte në ‘dëgjesën’ e thirrur nga Veliaj pasi e konsideronte një farsë ku Veliaj mblidhte nëpunësit e tij.
Nga ana tjetër ai në deklaratën e tij i bëri ftesë Veliajt që ai të vinte tek Teatri Kombëtar për tu përballur me intelektualë të vërtetë dhe jo me njerëz me spaleta.
“Unë jam njeriu më i lumtur sot se mora vesh me kë parti isha. Sot mora vesh nga kreu i Bashkisë se unë isha i futur së bashku me dy armiq të tjerë, Neritan Liçajn dhe Alfred Trebickën ne ishim dy të futurit e PD-së. Është kënaqësi vërtetë or mund ti them kryetarit të Bashkisë se është e kotë,ishte një mbledhje me nëpunësit e vet.
Si mund të shkojmë ne në këto dëgjesa që janë një farsë e çuditshme, një farsë që do të na hedhë hi syve. Ne i themi zotit Veliaj që të vijë këtu dh eta vëmë përballë intelektualëve të shquoar të Shqipërisë. Si Maks Velo, Përparim Kabo, Artan Fuga, Robert Ndrenika. Nuk do ta vëmë përballë ca njerëzve me spaleta”, tha ndër të tjera Derhemi.
