Kryeministri Edi Rama ka reaguar menjëherë për deklaratat e ambasadori amerikan, Donald Lu, i cili i kërkoi mesditën e së premtes që të mos fliste në emrin e tij. Nëpërmjet rrjeteve sociale, e cila është forma që kryeministri zgjedh sa herë nuk dëshiron që publiku të shoh situatën e tij të vështirë, ai ka shkruar se “Patjetër që unë flas për veten time dhe miku ynë (Lu) flet për veten e tij…”.
Ky shkëmbim i pazakontë mesazesh ndërmjet kryeministrit dhe “mikut të tij të shtrenjtë”, siç preferon ai ta konsiderojë ambasadorin Lu, erdhi pas deklaratave që kryeministri dha në Parlament, në mbrojtje të ministrit të Brendshëm, Fatmir Xhafaj, i cili gjendet nën ciklonin e akuzave të Partisë Demokratike për shkak të dënimit të vëllait të tij në Itali, për pjesëmarrje në organizatë kriminale për trafik narkotikësh.
Sipas opozitës, Fatmir Xhafaj ka fshehur dënimin e vëllait të tij dhe është angazhuar për të mos lejuar ekstradimin e tij drejt Italisë, ku duhet të vuajë dënimin prej 7 vitesh burgim.
Në fjalën e tij në Parlament, Edi Rama u shpreh se akuzat e opozitës për ministrin e Brendshëm janë të pabaza, pasi, sipas tij, nëse do të ishin të vërteta ‘do të kishte folur edhe miku ynë, Donald Lu”.
Por, ky qëndrim i kryeministrit Rama detyroi ambasadorin amerikan në Tiranë që të reagojë mesditën e së premtes. Për mediat shqiptare, Lu deklaroi se “Edi Rama të flasë në emrin e tij. SHBA flet në emrin e saj. Ne po i ndjekim zhvillimet lidhur me akuzat ndaj vëllait të ministrit të Brendshëm”.
