Të tjera detaje kanë dalë në pah përsa i përket atentatit të kryer një ditë më parë ndaj një të riu shqiptar në Athinë .
Mediat vendase shkruajnë se dy persona të maskuar kanë qëlluar ndaj shqiptarit 38-vjeçar me inicialet M.E, i cili ushtron profesionin e hidraulikut në Greqi.
Sipas dëshmisë së shqiptarit për policinë greke, ngjarja ka ndodhur brenda një pikë bastesh, pak pasi ka pirë një kafe me mikun e tij.
“Isha me një mikun tim në sheshin Viktoria dhe pimë kafe, shumë afër shtëpisë sime. U ndava nga ai dhe hyra në pikën e basteve, zakonisht shkoj tek një pikë që ndodhet në rrugën Heyden. U futa brenda dhe u ula në karrige. Në një fraksion sekonde pashë një njeri që hapi derën, ndërsa jashtë dyqanit po priste një tjetër, në një makinë. Të dy me fytyrë të mbuluar. Personi që u fut brenda, mbante një armë në dorë dhe nisi të qëllonte te këmbët e mia. Pas këtij momenti u largua me makinë”, mësohet të ketë dëshmuar shqiptari.
38 vjeçari shqiptar ka shpëtuar nga atentati, duke marrë vetëm 5 plumba në këmbë.
Mësohet se ai është i martuar, ndërsa e shoqja jeton në Shqipëri. M.E ka marrë shtetësinë greke që prej vitit 2016.