Nga Boldnews.al
Saimir Tahiri, 6 muaj pasi i shpëtoi arrestimit si pasojë e mbrojtjes politike nga Partia Socialiste, dha dorëheqjen nëpërmjet një deklarate mesditën e së Enjtes. Por largimi i tij, të paktën në bazë të lumit të kritikave që lëshoi për qeverinë dhe ish-bashkëpunëtorët e tij, duket se nuk do të kalojë lehtë.
Për herë të parë, ish-ministri i Brendshëm kritikoi hapur dhe publikisht kryeministrin Edi Rama, duke lëshuar edhe një mesazh “të koduar’ në adresë të tij. Thelbi i këtij mesazhi u duk qartë kur ai përmendi “sugjerimin” që i kanë dhënë miqtë e tij për “të akuzuar Edi Ramën për kanabizimin e vendit, që të shpëtoj veten”.
Saimir Tahiri është nën hetim për bashkëpunim me narko-trafikantët Habilaj. Opozita, shumë shpesh, e ka akuzuar Tahirin se ai kanabizoi vendin për llogari të Edi Ramës. Në këtë kontekst, përmendja e ‘sugjerimit” të miqve për të kaluar topin e përgjegjësisë te kryeministri Rama është qartësisht mesazhi i radhës që ish-ministri kampion po i dërgon shefit të tij.
Ndërsa kritikat e tjera ndaj Edi Ramës ishin të hapura dhe të qarta. Tahiri e konsideroi “për turp që Visho Ajazi, ish-shefi i Shërbimit Sekret, emërohet ambasador nga kjo qeveri ku kam bërë pjesë edhe unë”. Për Tahirin, Visho Ajazi ishte, së bashku me Adriatik Llallën, një prej njerëzve që luftoi më shumë Policinë e Shtetit, në kohën kur ai drejtonte Ministrinë e Brendshme.
Për Tahirin, Rama është përgjegjës edhe se përse nuk ka bërë aq sa duhet për të bindur qytetarët se kanabisi në Shqipëri është mbjellur më shumë në kohën e qeverisjes së Partisë Demokratike se sa në periudhën 2013-2018, kohë kurr qeverisin socialistët.
Duke lënë të kuptohet se ai mund të jetë “kokë turku” për integrimin e Shqipërisë në Bashkimin Europian, Tahiri lëshoi një lumë kritikash për mënyrën e qeverisjes së vendit. Ai përmendi me zë të lartë se “Shqipëria nuk mund të integrohet me këto probleme të mëdha në shëndetësi, arsim, në ekonomi, në pensione…”.Praktikisht, Saimir Tahiri, duke bërë apologjinë e tij, preku plagët më të mëdha të vendit, për të cilat po flet vetëm tashmë kur e sheh se toka nën këmbët e tij po rrëshqet.
