Grabitësit marrin një tjetër jetë! Ky është 52-vjeçari, Agim Buci, i cili mbrojti me jetë marketin e tij, teksa dje tentuan t’ia vidhnin. Babai i katër fëmijëve gjeti vdekjen rrugës për në spital, pasi u qëllua me armë zjarri, ndërsa bashkëshortja e tij Merita ndodhet në gjendje të rëndë në spital.
Ishte ora 21:07 minuta kur persona të armatosur duke përfituar nga errësira dhe fakti se njerëzit ishin fokusuar te ndeshja u futën në dyqanin e çiftit Buci në rrugën “OSBE” të Kamzës. Ata kërkuan nga i zoti i dyqanit që t’u jepte paratë, por u përballën me kundërshtinë e Agim Bucit. Dhe duke hasur kundërshtinë, grabitësit reaguan duke hapur zjarr mbi të dhe bashkëshorten e tij 44-vjeçare, Merita Buci.
Fatkeqësisht 52-vjeçari Buci nuk mundi të mbijetonte dhe ndërroi jetë. Ndërsa bashkëshortja e tij Merita Buci ndodhet nën kujdesin e mjekëve, jashtë rrezikut për jetën.
Agim Buci ishte baba i 4 fëmijëve, 3 vajzave dhe 1 djali. Ata që e njihnin e përshkruan si njeri të ndershëm dhe punëtor. Ndërkohë që autorët e kësaj ngjarjeje të rëndë nuk dihen ende. Policia ka vënë në dispozicion 500 mijë lekë kush jep informacion për identifikimin dhe kapjen e autorëve.
Pas mbërritjes në vendngjarje, policia ka nisur mbledhjen e provave materiale, si dhe ka sekuestruar pamjet nga kamerat e sigurisë të bizneseve pranë vendit të krimit.
Njoftimi i policisë:
Tiranë
Informacion paraprak
Më datë 25.04.2017, rreth orës 21:07, ka ardhur njoftimi se në rrugën “OSBE”, ka plagosje me armë zjarri.
Menjëherë në vendngjarje kanë mbërritur shërbimet e policisë dhe ambulanca ku nga verifikimet paraprake ka rezultuar :
Në rrugën “OSBE”, janë plagosur me armë zjarri në një dyqan shtetasit A. B., dhe M. B., (burrë dhe grua) nga persona ende të paidentifikuar.
Shtetasit e plagosur janë dërguar për ndihmë mjekësore në spital, ku shtetasi A. B., ndërroi jetë, ndërsa bashkëshortja ndodhet në gjëndje të rëndë shëndetësore.
Janë ngritur pika kontrolli në çdo rrugë dhe hyrje – dalje të Kamzës e në pika të tjera.
Vazhdon krehja e zonës dhe kontrolli i territorit.
Grupi hetimor në vendngjarje po punon për identifikimin dhe kapjen e autorit / ve.