Presidenti i Shqipërisë, Ilir Meta ka qënë i pranishëm në homazhet për nder të Liri Belishovës, ndarë nga jeta dy ditë më parë në moshën 92-vjeçare.
Meta pas nderimit mbi arkëmort, ka ndarë me ndjekësit e tij në “Facebook” dhimbjen e përjetuar, duke e quajtur Belishovën, emblemë të rinisë antifashiste shqiptare.
Postimi i Metës:
Me dhimbje të thellë nderova sot, një nga emblemat kryesore të rinisë antifashiste Liri Belishovën, e cila u nda nga jeta dy ditë më parë. Edhe njëherë mirënjohje pafund për një nga partizanet më të reja të LANÇ, vajzë e një familje të shquar patriotike të Mallakastrës, me kontribute të spikatura për pavarësinë e Shqipërisë dhe shtetit shqiptar. Dhimbja është edhe më e madhe, kur reflektojmë jo vetëm për zhgënjimin e këtij brezi idealist pas Luftës, por edhe për persekutimin ç’njerëzor dhe vuajtjet e patreguara që përjetuan shumë prej tyre!
