Pas Autoritetit te Komunikimeve Elektronike dhe Postare, edhe Autoriteti i Konkurrencës kërkon rikthimin e ofertave 30 ditore të paketave celulare nga operatorët.
Nëpërmjet një njoftimi për shtyp, Autoriteti i Konkurrencës bën të ditur se pas mbylljes së hetimit paraprak në tregun me pakicë të shërbimeve celulare vendosi dhënien e rekomandimeve për operatorët e tregut të telefonisë celulare. Rekomandimi ka të bëjë me rikthimin e kohëzgjatjes së vlefshmërisë së paketave me parapagim nga 28 ditë në 30 ditë.
“Autoriteti i Konkurrencës e vlerëson shumë të rëndësishëm zbatimin e rekomandimit nga Autoriteti i Komunikimeve Elektronike dhe Postare, por edhe bashkëpunimin ndërinstitucional, falë të cilit u bë e mundur rikthimi i paketave 30 ditore, në përfitim të konsumatorëve të tregut të telefonisë celulare dhe zbatim të ligjit nr. 9121, datë 28.07.2003 “Për mbrojtjen e konkurrencës”, i ndryshuar”, theksohet në njoftimin për shtyp të Autoritetit të Konkurrencës.
Sipas këtij institucioni, zbatimi i rekomandimeve të dhëna nga Autoriteti i Konkurrencës dhe masat rregullatore të ndërmarra nga AKEP sigurojnë, jo vetëm zbatimin e ligjit, por dhe një konkurrencë të lire dhe efektive nga ndërmarrjet që operojnë në tregun e telefonisë celulare.
Autoriteti i Konkurrencës bën të ditur se do të vijojë monitorimin e ndërmarrjeve që operojnë në këtë treg, me qëllim mbrojtjen e konkurrencës së lirë dhe efektive.
