Komisioni Evropian vlerëson se niveli i borxhit publik të Shqipërisë është i lartë, duke iu bashkuar shqetësimit të shfaqur më herët edhe nga partnerët kryesorë ndërkombëtarë të qeverisë për ekonominë, si FMN dhe Banka Botërore.
“Niveli i borxhit publik në Shqipëri mbetet i lartë krahasuar me vendet në rajon dhe është i lidhur me rreziqet ndaj stabilitetit makroekonomik ,në rast të goditjeve. Autoritetet kanë qenë në gjendje të zgjasin maturitetin mesatar të stokut të borxhit publik dhe ta zhvendosin gjithnjë e më shumë në drejtim të kreditorët e jashtëm. Pothuajse gjysma e borxhit është tani në valutë të huaj, shumica e të cilave në euro.
Kjo zhvendosje e borxhit do të thotë se rreziku i rollover është ulur, por norma e interesit dhe kursi i këmbimit janë rreziqet, që janë rritur. Pak më shumë se gjysma e borxhit publik është borxh i brendshëm, i dhënë kryesisht nga sektori bankar. Shumë prej këtyre huave janë ende afatshkurtra dhe duhet të rifinancohen shpesh”, vlerësohet në raportin e rekomandimit të KE-së për Shqipërinë.
Në këto momente, rënia e fortë e euros, tendencë që vijon që prej fillimit të këtij viti po favorizon qeverinë në sfidën e saj më borxhin. Pasi do të paguajë më pas për interesat. Por kjo situatë mund të ndryshojë në kahun e kundërt dhe të ketë kosto të mëdha, në rast se euro forcohet sërish.
Shqipëria regjistroi në fund të2017-ës një nivel të borxhit publik prej rreth 72% të Prodhimit të Përgjithshëm Kombëtar. Parashikimi për këtë vit është për ulje të tij në 69% të PBB-së dhe më tej në 66.6% në fund të 2019-ës dhe 64.7% në vitin 2020.
Një objektiv i vështirë për t;u arritur, në kushtet kur ka nisur tashmë programi 1 miliard euro i Partneritetit Publik Privat. Në thelb borxh i shtrirë në kohë, por që nuk kontabilizohet si i tillë tek treguesi i borxhit publik.
