Nga Boldnews.al
Prokuroria e Durrësit ka shënuar një dështim spektakolar të premten e kaluar, kur është rrëzuar në gjykatë për kërkesat për arrestim për disa zyrtarë të rëndësishëm lokalë në qytetin bregdetar.
Gjykata e Durrësit nuk ka pranuar kërkesat për arrest, të firmosura nga shefja e Prokurorisë së Durrësit, Donika Prela, për shkak se ato nuk bazohen në prova dhe as në dyshime të arsyeshme.
Pak ditë para dorëzimit të raportit të Komisionit Europian, kryeprokurorja e Durrësit ka synuar të japë kontributin e saj në rritjen e performancës në goditjen e zyrtarëve drejtues. Por, nxitimi i ka kushtuara asaj rrëzimin e njëpasnjëshëm të të paktën 5 kërkesave për arrest, ndaj zyrtarëve të rëndësishëm në Hipotekë, Aluizni, Drejtorinë e Transportit Detar, etj.
Madje, nëpërmjet kësaj lëvizjeje të nxitur, Donika Prela nxori bllof edhe disa ministra të qeverisë, përfshirë Ministren e Drejtësisë, Etilda Gjonaj, e cila deklaroi disa ditë më parë nga Durrësi se do të kishte penalizime të rënda për zyrtarë që kanë abuzuar me detyrën.
Paraditen e së premtes, prokurorët e seksionit kundër korrupsionit, kanë marrë kërkesat e firmosura nga kryeprokurorja Donika Prela dhe i janë drejtuar gjykatës për të marrë lejen për arrestimin e disa zyrtarëve të rëndësishëm lokalë.
Por, gjykata, pasi ka shqyrtuar dokumentacionin e paraqitur nga Prokuroria, ka vendosur t’i rrëzojë të gjithë kërkesat një nga një, pasi nuk gjeti asnjë element për të inkriminuar zyrtarët. Në këtë mënyrë, prokurorët panë se si, për shkak të nxitimit të shefes së tyre, dështuan me sukses në gjykatë.
Por, ky dështim ka sjellë edhe pasoja të tjera në raportet me institucionet e ndryshme në Durrës, përfshirë edhe me Bashkinë e qytetit. Zyrtarët për të cilët kërkohej arrestimi pa prova janë në përgjithësi njerëz të afërt me kryebashkiakun e Durrësit, Vangjush Dako, një prej njerëzve më të afërt të kryeministrit Edi Rama.
Kjo sjellje “e fortë” e Donika Prelës, e cila kërkon arrestimin e zyrtarëve pa prova, duket se do t’i kthehet në bumerang dhe në një përplasje të fortë me kryebashkiakun e Durrësit, por edhe më tej.
