Deputetja e PD, Jorida Tabaku ka thënë se PD nuk vendosu taksë shtesë në ‘Rrugën e Kombit kur ishte në pushtet, sepse taksën për mirëmbajtjen e rrugës qytetarët e paguajnë tek taksa e qarkullimit. E ftuar në rubrikën ‘Opinion’ në News24, Tabaku u shpreh se kjo rrugë quhet ‘Rruga e Kombit’, por në fakt po e ndan kombin.
“Gjiknuri gënjen dhe nuk i di planet që ka pasur Rama. Qeveria e PD ka kërkuar një studim për ato rrugë që janë bërë me para private. Nga viti 2010 deri në vitin 2013, PD nuk ka pasur ndërmend të bëjë me pagesë këto rrugë. Nuk e bëri sepse këtë taksë për mirëmbajtje të rrugës qytetarët e paguajnë në taksën e qarkullimit. Koncesioni është dhënë për 30 vite dhe 430 mijë euro merr koncesionari edhe nëse nuk ka qarkullim sepse do marrë paratë nga shteti. Pra koncesionari është i mbrojtur, por qytetarin kush e mbron? Koncesionari ka sigurinë maksimale për investimin. Kjo rrugë quhet ‘Rruga e Kombit’, por e ndan Kombin”- tha Tabaku.
Deputetja e PD u shpreh ndër të tjera se taksa në ‘Rrugën e Kombit’ është anti-ligjore, pasi nuk mund të bëhet me urdhër të kryeministrit, por me një ligj të veçantë.
“Qeveria nuk ka pasur negociata dhe diskutime për kontratën me koncesionarin. Taksat vihen me një ligj të veçantë. Ne mendojmë se taksa është anti-ligjore dhe anti-kushteuese dhe ne do mbështesim qytetarët për të drejtën e tyre. Ajo kontratë është e paligjshme sepse nuk mund të vendoset me mendjen e kryeministrit, por me ligj të veçantë. Mosbindja civile është refuzimi për të mos paguar taksën në ‘Rrugën e Kombit’. Mosbindja civile është e vetmja mundësi që qeveria të dëgjojë popullin. Thirrja që ka bërë PD ka ardhur nga bizneset”- tha Tabaku.
KOMENTO