Nga Boldnews.al
Tarifa e Rrugës së Kombit e ka vënë qeverinë “Rama” në vështirësi të madhe, gjatë ditëve të fundit. Jo vetëm në Kukës, por edhe në Kosovë, kjo tarifë është shoqëruar me reagime dhe protesta publike dhe zyrtare.
Më të dëmtuarit nga kjo taksë janë qytetarët e Kukësit dhe të zonave të tjera veriore të vendit, të cilët duhet të paguajnë për të kaluar “kufirin” për në Tiranë.
Në vitin 2016, qeveria u kishte premtuar kuksianëve se do të parashikonte masa, që ata të mos dëmtoheshin ekonomikisht nga aplikimi i kësaj takse. Por sot, kur konçensionari i drejtuar nga “oligarku” i rij, Shefqet Kastrati, ka vendosur traun, premtimi qeveritar për kuksianët është hedhur në erë.
“Boldnews.al” zbardh proces-verbalin e Komisionit Parlamentar të Veprimtarisë Prodhuese, dt. 16.11.2016, ku është prezantuar premtimi qeveritar për ndihmën ndaj banorëve të Kukësit. Në atë mbledhje, ish-ministri i Transporteve, Sokol Dervishaj, iu përgjigj shqetësimit të ish-deputetes demokrate, Mimoza Hajdarmataj, lidhur me tarifimin e Rrugës së Kombit.
Ligjvënësja nga Tropoja pyeti ministrin nëse, ishte parashikuar “lehtësi për banorët që shkojnë në Kukës, Has, Tropojë, apo për ata që vijnë për të marrë një shërbim mjekësor, apo për çdo lloj gjëje që vijnë drejt Tiranës? A do të kenë ata një disbursim, kompensim apo falje?”.
Ministri Dervishaj, i cili ishte nga radhët e LSI-së në kabinetin qeveritar, u deklarua i bindur se do të merreshin të gjitha masat për të lehtësuar financiarisht kuksianët dhe banorët e tjerë të Veriut nga taksa mbi Rrugën e Kombit.
Pyetja që ju shtroni është jashtëzakonisht shumë e drejtë: çfarë do të bëhet me banorët e Kukësit?, tha Dervishi. “Në negociatë, kjo është një nga çështjet kryesore që ne do të trajtojmë, jo thjesht për ata që kanë ndonjë hallë apo emergjencë të transportit mjekësor, por për të gjithë banorët e Kukësit duhet gjetur një zgjidhje optimale, që ata as të mos i rëndojë, as të mos i ngarkojë, as të mos ju prishë terezinë financiare, me njëfarë kuptimi, sepse duke parë dhe pasur parasysh specifikat e zonës, varfërinë, problemet sociale që ajo ka, kjo do të jetë një nga çështjet kryesore që do të marrim në konsideratë gjatë negocimit të kësaj kontrate dhe këtij koncesioni.
