Gjykata Kushtetuese është vetëm si godinë, por ka humbur fuqinë e saj juridike, duke u kthyer në institucion që nuk ekziston më. Komisioni i Pavaruar i Kualifikimit (KPK) shkarkoi anëtarin e kësaj gjykate Fatos Lulo, me motivacionin se nuk justifikon pasurinë, ky institucion ka pushuar së funksionuari. Në këtë mënyrë ra edhe një “kala e fundit” që kishte mbetur ende pa u marrë nga kryeministri Edi Rama.
Dhe nuk është pak, pasi i vetmi institucion që nuk po i përgjigjej tekave të kryeministrit, ishte kjo gjykatë, e cila tashmë ka mbetur me vetëm pesë anëtarë dhe nuk mund të marrë asnjë vendim. Shenjat janë që për një kohë të gjatë edhe vendet e mbetura bosh nuk do të plotësohen, për aq kohë sa çështja mbetet në duart e politikës. Pasi kuptoi që kushtetuesja mbeti si kufomë ende e pa varrosur, jo rastësisht qeveria vendosi që rruga e kombit të taksohej, ku për autoveturat do të paguhet 5 euro, ndërsa për kamionët 22.5 euro. Juristët shprehen se nëse do të ishte funksionale Gjykata Kushtetuese, kjo taksë mund të binte ende pa nisur vjeljen ndaj qytetarëve, apo subjektet private që përdorin rrugën Durrës-Kukës dhe ansjelltas.
Në kushtetutë është e përcaktuar që për një zë takse, nuk mund të paguhet dy herë. Aktualisht është në fuqi taksa e qarkullimit, që është i detyruar që ta paguajë çdo drejtues automjeti dhe për ekspertët taksa e rrugës është jo vetëm e tepërt, por antiligjore. Gjithashtu kushtetuesja mund t’i prishte jo pak punë kreut të qeverisë, nëse nënshkruhet marrëveshja e detit me greqinë. Si e vetmja mënyrë për ta kundërshtuar një marrëveshje të re që mund të binte ndesh me interest kombëtare, ishte Gjykata Kushtetuese, por ajo nuk dihet kur do të plotësohet me anëtarët e rinj, pasi institucionet e reja të drejtësisë ende nuk janë krijuar.
Prokurori e SHISH i kapur
Duke kaluar në institucionet e tjera jo pak të rtëndësishme mbetet Prokuroria e Përgjithshme. Ndonëse zyrtarisht konsiderohet institucion i pavarur, zgjedhja e kryeprokurores së re Arta Marku me 69 të mazhorancës, ishte sinjali i parë se edhe akuza kaloi në duart e qeverisë. Faktet kanë treguar se që nga dhjetori i vitit të kaluar janë hapur dosje kundër zyrtarëve dhe ish-zyrtarëve të opozitës, ndërsa përkujdesja e veçantë shkon në anën tjetër, ku nuk po hapen hetime të reja dhe aq më rëndë po sfumohen edhe ato çështje të cilat ishin në proces hetimi, si dosja ndaj ish-ministrit Saimir Tahri, i akuzuar për trafik ndërkombëtar të lëndëve narkotike në kuadër të grupit të strukturuar kriminal dhe ndaj tre ish-drejtuesve të lartë të policisë së Vlorës që janë në kërkim.
Një tjetër institucion që erdhi “dhuratë” në duar kryeministrit ishte edhe Shërbimi Informativ Shtetëror. Pas dorëheqjes së Visho Ajazi Likës, kryeministri Edi Rama propozoi në këtë post zëvendësdrejtorin e SHISH, Helidon Bendon. U përfol gjatë se ishte që më parë njeriu i mazhorancës në shërbimin sekret. Për të kapërcuer një shkallë më lart, Bendo do të duhet të marrë miratimin e Presidentit të Republikës, por kreu i shtetit prej muajsh heziton të aprovojë kandidaturën kryeministrore. Pavarësisht kësaj, SHISH është i sigurt, pasi edhe pa dekretimin e presidentit Bendo po kryen funksionin e drejtorit.
