Prokuroria e Vlorës, në përfundim të gjykimit të dosjes ”Karaburuni”, kërkon konfiskimin dhe kalimin në favor të shtetit të 220 hektarëve të fituar me dokumenta fallse.
”Boldnews.al” ka siguruar në mënyrë ekskluzive dosjen e plotë të prokurorisë, në të cilën janë të shënuar emrat e personave që kanë blerë tokë nga grupi i fallsifikatorëve, të drejtuar nga Rajmond Mëzi.
Nëse pranohet kërkesa e prokurorisë për konfiskimin e këtyre tokave, atëherë pronarët Vip duhet të përfshihen në procese të tjera gjyqësore, për të fituar të drejtën e tyre.
Një prej blerësve më të mëdhenj të tokave në plazhin e Shën Vasilit, në Karaburun, është një emër i njohur në biznesin vlonjat, Artur Shehu. Vitë më parë, Shehu ka qenë një prej personazheve kryesore edhe të kronikës së zezë, për shkak të problemeve penale.
Artur Shehu, i cili prej vitesh jeton në Shtetet e Bashkuara të Amerikës, ka qenë një prej rivalëve kryesore të Zani Çaushit, emri kryesor i botës së krimit në Vlorën e vitit 1997.
Në vitin 2010, emri i Shehut përmendet sërish në hetimin e gjykatës së Leçes, ku personazh kryesor ishte Albino Prudentino, një ndër bosët e klanit mafioz “Sacra Corona Unita”. Ky i fundit u arrestua në Vlorë, në bazë të një urdhri ndërkombëtar të autoriteteve italiane.
Hetimet e Prokurorisë së Leçes arritën të provonin se Prudentino kishte arritur të krijonte një rrjet pastrimi parash në Shqipëri, me ndihmën e disa banorëve të Vlorës, përfshirë edhe Artur Shehun.
Shehu ka realizuar blerjen e rreth 100 hektarë tokë në Karaburun, nëpërmjet personit të autorizuar, noteren Belona Seraj. Me noteren, Shehu, i cili prej vitesh nuk vjen në Shqipëri, i ka zhvilluar takimet në një prej vendeve të vogla të Bashkimit Europian.
Gerian Kuka, administrator i kompanisë A.E.Distribution” sh.p.k rezulton se ka blerë mbi 10 hektarë tokë nga Rajmond Mezi. Kuka është pronar i një pjese toke edhe në zonën e Palasës, aty ku kompania ”Green Coast” po ndërton një fshat turistik, shumë pranë bregut të detit.
Arjan Laçi, biznesmen durrsak, rezulton se është pronar i 5 hektarëve tokë në plazhin e Shën Vasilit. Emri i Laçit është përmendur më parë edhe si bashkëpronar në kompaninë ”DIA”, të krijuar nga Kastriot Ismailaj. Bashkëpunimi i tyre u prish shumë shpejt, pasi Ismilaj rezultoi se e përjashtoi me mashtrim nga investimet e kompanisë.
Në vijim të dosjes ”Karaburuni”, ”Boldnews.al” do të shpjegojë me detaje se si është realizuar skema e vjedhjes së tokave në një prej perlave të bregdetit Jonian.
