Banorët e Ndroqit kanë bllokuar për tre orë rrugën që të çon në Durrës në shenjë proteste për shkak të gjëndjes skandaloze ku ndodhet kjo rrugë, me gropa dhe pa sinjalistikë.
Rruga Plepat-Rromanat-Ndroq vijon të jetë e braktisur nga shteti pavarësisht se ata e kanë ngritur zërin dhe ky aks që lidh Tiranën me Durrësin është i favorshëm për ata që duan të vizitojnë bregdetin.
Por degradimi e bën të pakalueshëm, prandaj për afro tre orë, banorët bllokuan rrugën dhe nuk lejuan kalimin e automjeteve. Për banorët kjo është hera e tretë brenda këtij viti që ngrenë zërin.
“Projektet janë bërë disa herë por nuk ka asnjë investim. Të paktën ta shtrojnë asfalt , nëse nuk kanë mundësi ta bëjnë nga e para. Ne jemi mes Durrësit e Tiranës, paguajmë taksa, por ndihemi të izoluar. Rruga është copë-copë. Kemi tre herë që protestojmë por nga qeveria nuk ka asnjë reagim. Ne do të përshkallëzojmë protestat tona duke bllokuar autostradën por dhe duke protestuar para kryeministrisë”- kanë thënë banorët.
Banorët paralajmërojnë nëse nuk do ketë reagime nga instancat e larta, protesta do përshkallëzohet duke bllokuar dhe autostraden Tirane-Durrës.
Në 35 kilometrat e saj rruga është në gjëndje të degraduar duke u kthyer në rrezik potencial për aksidentet.
“Në 27 vjet në këtë rrugë nuk është bërë asnjë investim”- shprehen banorët.
Nëse zëri i tyre nuk dëgjohet atëherë ata do të bojkotojnë zgjedhjet e ardhshme lokale.
