Fatura negative e investimeve në arkën e shtetit është 36 milion euro. Ky zë në terma vjetorë u zgjerua me rreth 4 herë.
Të dhënat publikohen nga Banka e Shqipërisë në Raportin e Bilancit të Pagesave. Referuar të dhënave zyrtare, 44 milion euro rezulton fluksi dalës që prezantohet në formën e pagesave të dividendëve dhe fitimit i riinvestuar, ndërësa pagesat e interesave të borxhit rezultojnë 15 milionë euro.
Sipas Bankës së Shqipërisë, investimet e huaja direkte kanë shënuar një rënie në vitin 2017.
Stoku i investimeve të huaja arriti në 908 milionë euro, me një tkurrje prej 3.7% në krahasim me të njëjtën periudhë të një viti më parë.
Në tremujorin e katërt investimet e huaja ranë në 232 milionë euro, nga 300 milionë euro që kishin arritur në tremujorin e mëparshëm, ndërkohë që në tremujorin e parë dhe të dytë kishin qenë më të ulëta, përkatësisht në 175 dhe 201 milionë euro.
Në vitin 2016, investimet e huaja kanë shënuar nivelin historik maksimal prej 943 milionë eurosh.
Ekspertët e shpjegojnë këtë fenomen me ndërtimin e projekteve të mëdha të energjisë, sidomos gazsjellësit TAP në të cilin janë investuar 500 milionë euro.
Referuar po raportit të BSH-së, në baza vjetore, flukset hyrëse në kategorinë e investimeve kanë rënë me 3%, ndërsa ato dalëse janë rritur me 45%.
Të ardhurat neto faktoriale nga puna, të cilat përfaqësojnë flukset kryesore hyrëse të të ardhurave parësore, vlerësohen në 71 milionë euro, rreth 9% më të larta se një vit më parë.
