Situata e përbytjeve në Shkodër është gjithnjë e më e rëndë sa më shumë kalon koha, ndërsa masat e marra ende janë në nivele të ulëta. Për përmbytjet masive, kryesisht në zonën e Nënshkodrës, reagoi edhe Kryetari i Partisë Demokratike Lulzim Basha. “Gjendja në Shkodër po përkeqësohet nga ora në orë. Qindra familje janë të izoluara nga uji. Dhjetëra prej tyre janë evakuuar vetëm orët e fundit”-shkruan kreu i PD-së në facebook.
Sipas tij, kjo gjendje alarmante ka ardhur si pasojë e shkarkimeve të heceve nga KESH. “Deri tani kryeministri dhe vartësit e tij kanë injoruar kërkesën e përsëritur të kryetares së Bashkisë, këshillit bashkiak, kryetares së Qarkut dhe deputetëve demokratë, për të shpallur emergjencën.
Në këto kushte kjo nuk është vetëm e papërgjegjshme por KRIMINALE”-thotë Basha ndër të tjera. Prej të paktën dhjetë ditësh, disa njësi administrative në Shkodër përballen me përbytjet masive, ku mbi 2500 hektarë tokë bujqësore është përbytur, duke shkaktuar dëme të mëdha në të mbjella. Niveli i ujit është rritur gjatë orëve të fundit dhe tashmë rrezikohen dhjetëra banesa. Masat e marra deri më tani kanë qenë të pamjaftueshme për nevojat që kanë banorët, krysisht të Obotit dhe Anës së Malit.
