Ulsi Manja ka shkaktuar debate të ashpra në mbledhjen e parë të Këshillit të Emërimeve në Drejtësi, duke synuar bllokimin e emërimit të gjyqtarëve të rinj të Gjykatës Kushtetuese. Ai është përplasurme disa prej anëtarëve të KED-së
dhe me Avokaten e Popullit, Erinda Ballanca, për mënyrën e funksionimit të këtij institucioni.
Manja ka kërkuar që anëtarët e KED-së të kalojnë fillimisht Vetingun dhe më pas të nisin procedurat për përzgjedhjen e tre anëtarëve të rinj të Gjykatës Kushtetuese. Ky qëndrim i Manjës është tërësisht i kundërt me atë që mbajti për emërimin e Prokurores së Përgjithshme të Përkohshme, Arta Marku. Kjo e fundit, njohje e vjetër e Ulsi Manjës, vijon ende të jetë e pa-vetuar, edhe përse ka mbi tre muaj në detyrë.
Avokatja e Popullit, Erinda Ballanca ka debatuar me kryetarin e Komisionit të Ligjeve, duke deklaruar se procedura e propozuar nga Manja vonon plotësimin e vakancave në Gjykatën Kushtetuese, e cila aktualisht është në kolaps. Aktualisht, Gjykata Kushtetuese funksionon me 6 nga 9 anëtarë, duke ndikuar negativisht në ecurinë normale të këtij institucioni shumë të rëndësishëm në piramidën shtetërore.
“Boldnews.al” ka mësuar një pjesë të debateve të zhvilluar në mbledhjen e parë të Këshillit të Emërimeve në Drejtësi, të cilat përmblidhen si më poshtë:
Ulsi Manja (Kryetar i Komisionit të Ligjeve): Unë jam i mendimit që ju, si anëtarë të Këshillit të Emërimeve në Drejtësi duhet të kaloni fillimisht procesin e vetingut dhe më pas të nisni procedurat për verifikimin e kandidaturave për anëtarët e rinj të Gjykatës Kushtetuese. Reforma në Drejtësi e ka parashikuar që anëtarët e KED-së kalojnë me përparësi në procesin e Vetingut. Prandaj, të presim që të dalin rezultatet e Vetingut dhe më tej ju të vijoni procedurat që ju ka ngarkuar ligji.
Erinda Ballanca (Avokate e Popullit): Unë jam tërësisht kundër qëndrimit të paraqitur nga zoti Manja. Kjo kërkesë e tij shtyn procesin e përzgjedhjes së anëtarëve të Gjykatës Kushtetuese. Procesi i Vetingut për anëtarët e KED-së ka nisur, por ai mund të kërkojë një kohë të gjatë. Ne nuk kemi luksin që të presim sa të përfundojë procesi i Vetingut, pasi kështu bllokohet funksionimi i Gjykatës Kushtetuese. Kjo gjykatë aktualisht është në kolaps të plotë, për shkak se mungojnë 3 anëtarë.
Vitore Tusha (Anëtarë e KED, Gjykata Kushtetuese): Unë nuk shoh asnjë problem që KED të funksionojë, ndërkohë që po zhvillohet edhe procedura e Vetingut. Ne sot kemi institucione që funksionojnë, edhe pse nuk kanë kaluar ende në Veting. Gjykata Kushtetuese po funksionon, edhe përse anëtarët e saj ende janë në proces rivlerësimi kalimtar.
Artan Broci (Kryetar i KED, Gjykata e Lartë): Mendoj se e rëndësishme është që fillimisht të nisim me hartimin e Rregullores se si do të funksionojë Këshilli i Emërimeve në Drejtësi. Ndërkohë, sa për diskutimet e sotme, i nisim edhe një shkresë Komisionit të Pavarur të Kualifikimit për të përshpejtuar procesin e rivlerësimit kalimtar të anëtarëve të KED-së. këto çështje i diskutojmë sërish edhe në mbledhjen e ardhshme të Këshillit të Emërimeve në Drejtësi.
…..
Këshilli i Emërimeve në Drejtësi (KED) është një prej institucioneve të krijuara pas Reformës në Drejtësi. Ai përbëhet nga 9 anëtarë, të gjithë gjyqtarë dhe prokurorë. Komisioni i Ligjeve dhe Avokati i Popullit kanë rol vëzhgues. KED verifikon kandidaturat për anëtarë të Gjykatës Kushtetuese dhe të Inspektorit të Lartë të Drejtësisë, para se ata të votohen në Parlament.
