Kryeministri Edi Rama dhe ministri i Jashtëm Ditmir Bushati do të udhëtojnë më 20 mars drejt Brukselit, ku do të organizohet një konferencë, e cila i paraprin publikimit të “paketës së zgjerimit” që do të njoftohet nga BE më 17 prill.
Konferenca është organizuar nga eurodeputeti David Sassoli, me pjesëmarrjen edhe të Presidentit të PE-së Antonio Tajani dhe përfaqësueses së lartë të BE-së, Federica Mogherini.
“Shqipëria është e gatshme për të hapur negociatat për anëtarësim në Bashkimin Europian. Vitet e fundit, ajo është angazhuar në reformat që kanë të bëjnë me sundimin e ligjit, qeverisjes, ekonomisë dhe drejtësisë”, është shprehur eurodeputeti Sassoli.
Ky takim parashikon një javë vendimtare për dialogun midis Tiranës dhe Brukselit.
Kushti i fundit që duhet të plotësojë Tirana është zbatimi i plotë i reformës në drejtësi, e cila përfshin proçesin e verifikimit të përbërjes së organit gjyqësor në vend.
Komisioni ka rekomanduar që në nëntor të 2016-ës çeljen e negociatave të anëtarësimit mes BE dhe Shqipërisë,si kusht kryesor zbatimin e vetingut dhe çuarjen përpara të reformës në drejtësi.
Kryeministri Rama ka thënë para pak javësh në prani të Presidentit të Komisionit Evropian Jean Claude Juncker se Shqipëria i meriton negociatat,por gjithçka do të varet nga vendimi i 28 vendeve anëtare të BE-së.
“Ne do jemi përkrah Shqipërisë për ta ndihmuar të përgatisë anëtarësimin. Në mënyrë që vende të tjera të bashkohen me Bashkimin Europian do të na duhet që të gjitha problemet, grindjet ndërmjet vendeve kufitare të jenë të zgjidhura deri në datën e anëtarësimit”, tha Juncker, ndërsa ishte në Shqipëri, në kuadër të turit rajonal.
